Veldeke prizzentieërtj…. Dialectwédstriêd 2026
Veldeke Wieërt reuptj daelnemers op vörre Dialectwédstriêd 2026
OPROOP: Aanne Knaal
Veldeke Wieërt reuptj daelnemers op vörre Dialectwédstriêd 2026
Wannieër
Zoondigmiddig 4 oktoeëber a.s. és de Dialectwedstriêd 2026 van Veldeke Wieërt.
Vae rope minse in Midde-Limburg op um heejvör e gedicht of kort verhaol in eur eige dialect in te steure.
’t Thema vanne regionale taalwédstriêd és dit jaor ‘Aanne Knaal’.
De rieëje vör dieës kuuës és de fieëstelike herdînking van twieëhóngerd jaor Zuid-Willemsvaart in 2026.
Thema Zuid-Willemsvaart
Weem wiltj mejdoon, schrieftj e gedicht of kort verhaol det op hieël eîge meneer te make hieët métte Zuid-Willemvaart. Det kân gaon oeëver de vaarwieëg zelf, mer ouch oeëver geveules, herinneringe of ervaringe mét, aan, op, langs of inne knaal tösse Maastricht en Den Bosch.
Vuuërwaarde vör daelname
De wédstriêd stieët oeëpe vör ederein inne regio Midde-Limburg dae schrieftj in e regionaal dialect. Alle inzendinge moge neet mieër as 500 wuuërd telle.
’nen Deskundige jury keesj drej winnaars uut. Vör de ieërste, twieëdje en dérdje plaats zeen gêldjpriêze van resp. € 500,= € 350,= en € 200,=. Daonaeve éster vörre winnaars ‘ne spesjale trofee.
Mieër informatie
Tiêdes de wédstriêdmiddig zeen d’r ouch optraejes van dialectartieste.
Mieër informatie oeëver jury, artieste, locatie en tiêd volgtj nog. Noow ieërst: aanne slaag!
Insteure
Insteure kân vanaaf noow wis uuterlik maondjig 14 september 2026.
Daovör mójjen eur beejdrage, mét daobeej vuuërnaam, achternaam, laeftiéd en woeënplaats (eur dialect), maile nao info@veldekewieert.nl.
Dialectcursus Laeze en Schriêve Naojaor 2026.
De cursus Laeze & Schriêve Naojaor 2026 és ingepland!
De data vör dieëze cursus zeen:
dieënsdige 06.10, 13.10, 20.10, 27.10, 03.11 en 10.11, aanvang 19.30 oor.
De cursus van zés lesse és vör edereîn dae de basis wiltj lieëre van ’t laeze en schriêve in ’t Wieërtlands dialect. De cursusaovendje zeen in ’t vuuërjaor oppe woonsdig en in ’t naojaor oppe dieënsdig. Ze waere gegaeve in e léslokaal van Keenter Hart, Sint Jozefskerkplein 3 Wieërt, en eure meîster és drs. Frits Nies.
Inne cursus waere de spelling en grammatica gebroêktj, zoeëwi-j opgenoeëme in oeës hendjige naoslaagwêrk uut 2023: Nog neet uutgekaldj – Woeërdeliêst van ’t Wieërtlands dialect.
Dit book weurtj inne cursus gebroêktj. Nao aafleêvering aan ’t indj vanne cursus van eur eîge Meîsterwêrk krieje as deîlnemer ’n offesjeel Getuûgschrift van Veldeke Wieërt.
De köste zeen: € 150,00 p.p., inclusief koffie&thieë plus 1 ex. van Nog neet uutgekaldj (aanne ledepriês).
Ajjen ’t book Nog neet uutgekaldj al hetj, dan betaaldje € 115,00.
Letj waal op: eur aanmelling stieët pas vast aszje betaaldj hetj op óngerstaondj bânknommer.
Vae steure uch dan ‘ne mail um eur deîlname te bevestige.
Vae kunne max 20 deîlnemers per cursus plaatse. De belangstelling és groeët, det betaekentj det d’r nog mer înkele plaatse oeëver zeen (19-05-2026).
Limburgse Finale Declamatiewédstriêd 6 juni in Wieërt
Zaoterdig 6 juni a.s. vingtj weer de provinciale finale plaats vanne jaorlikse Declamatiewedstrijd van Veldeke Limburg. Nao de lokale halve finales in Echt, Sustere, Venlo, Tegelen en Wieërt staon zaoterdigmiddig 6 juni dertig finaliste op ’t podium inne zaal beej Keenter Hart in Wieërt vör dit jaorlikse ‘Fieëst vanne Moôdertaal’.
De winnaars 1 en 2 van oeëze halve finale zeen ve neteurlik ouch weer trök: Alice Ogier, Eline van Velthoven, Evi Prijs, Milan overheul, Jamie Ogier, Aivi van Gansewinkel, zet ‘m op!
De provinciale jury: Peggy Alofs, Peter van den Bosch, Frank Giesen, Joris Jentjens en Andrea Peeters.
Prizzentator: Wieërtenaar Ton Thijssen.
Kindertheatermaker Willem Hoeben verzörgtj e optreejje inne pauze.
Limburgse Finale Declamatiewedstrijd 2026,
Zaterdag 06 juni, 13.30 uur,
Keenter Hart, St. Jozefskerkplein 3, 6006 ZH Weert.
Veldeke decorandus Mark Bouwmans
E schoeën spektakel op ‘t Raphaelpad tiedes de jubileumtour van Veldeke Limburg op zaoterdig 2 mei … mét as klapper ‘nen ieëremedalie vör Mark Bouwmans van Veldeke Limburg vör al zien dialectverdeenste in ‘t Wieërterlând.
En ‘t besteur van Veldeke Wieërt mét de decorandus Mark oppe foto.
(Foto collage Wes van Renswouw. Foto Felicitatie WdG.)
Veldeke op Paad in Wieërt op 2 mei 2026
| Um ’t 100-jaorig bestaon te vieëre, maaktj Veldeke Limburg ‘nen tournee doeëre provincie. Zaoterdig 2 mei keumtj dit ‘Veldeke op Paad’ ouch in Wieërt. Vanaaf 10.30 oor és aan ’t Sint Raphaëlpad, beej Theater de Huiskamer, ’n manifestatie mét artieste van binne en boete Wieërt deej eur dialect laote huuëre. Wieërt és daen daâg ónger ângere vertieëgewoeërdigdj doeër zangeres/componist Van boete Wieërt kaome De Nachtbraeksters uut Venray en Huub Janssen uut Wanssum. Daonaeve kân ’t pebliek mejdoon aan ‘ne bezûndjere Dialectkwis woeëmej priêze te winne zeen. ’t Doortj ongevieër 2 oor en és vör ederein gratis. Veldeke Limburg gieët op mieër daag langs alle 10 lokale Veldekekringe, ónger t motto ‘Veldeke op Paad’. Dit as aanloup nao de groeëte jubileumviering. |
| Pregramma zaoterdig 2 mei 2026 – Locatie: St. Raphaelpad 10.30 oor Welkom doeër veurzitter Veldeke Wieërt |
Getuûgschrift vör 20 cursiste Laeze & Schriêve op 1 aprîl 2026
Woonsdig 1 april hieët oeëze ‘meîster’ Frits Nies tot besloêt vanne vuuërjaorscursus Wieërtlands Laeze & Schriêve aan 20 enthousiaste cursiste ’t Getuûgschrift uutgereîktj.
Dit gebuuërdje nao ’t vuuërlaeze en bespraeke vanne léste léstaak. Det wore de doeër de deîlnemers zelf geschrieëve ‘meîsterwêrke’; e verhaol van max. 500 wuuërd in ’t Wieërtlands oeëver ’n óngerwêrp nao eîge kuuës. De resultate wore bezûnjer, good en ouch weer verrassendj.
Naojaorscursus
De volgendje cursus Wieërtlands Laeze en Schriêve startj nao Wieërt Kêrmes, in oktoeëber.
Aanmelle kân al via info@veldekewieert.nl.
Veldeke Limburg vieërtj eur 100 jaorig bestaon op 23 mei 2026.
Dit jaor vieërtj Veldeke Limburg eur 100 jaorig bestaon.
Daorum és ‘t groeët fieëst op 23 mei woeëvör vae uch names veurzitter Reg van Loo van ’t Provinciaal Bestuur Veldeke Limburg met plezeer nuuëje.
Daag en tiêdstip:
‘t Jubileumfieëst és op 23 mei 2026 in het Toon Hermans Theater in Zitterd. ‘t Programma startj um 10.30 oor en weurtj aafgesloeëte roond 17.00 oor. Vuuëraaf begroeëte vae uch mét koffie en vlaaj. Ouch vör ‘ne lekkere lunch mét muzikaal intermezzo weurtj gezörgdj. Nao aafloup és d’r tot 18.00 oor de meugelikheid vör ‘ne borrel.
Programma:
– De towkómst vanne Limburgse taal in eine mêrge (10.30 – 12.30).
In ’t mêrgeprogramma neme veer limburgse taalkinners uch mej in eur specifiek vakgebied enne daobeej behuuërendje kiêk oppe limbugse taal. Aansloeëtendj vingtj d’r ónger lejjing van prizzentator Henk Hover ’n discussie plaats tösse de specialiste en ’n aantal limburgse prominente.
– Huuëgdjepûnt van 100 jaor limburgse geschiedenis in eine middig (14.00 – 17.00 oor).
In ’t middigprogramma maakdje same mét bekindje (en minder bekindje) limburgse artieste ’n speulse, muzikale en humoristische reis langs 100 jaor Limburgse geschiedenis.
’t Beloeëfdj ‘ne schoeëne daag te waere woeë dejje óngerdompeldj waertj in al ’t schoeëns det oeës taal (enne provincie) riêk és.
Mieër informatie of metein inschrieëve?
Veldeke Limburg zuuët eur aanmelding gaer vuuër 1 mei 2026. Kiektj heejvör op Veldeke Limburg 100 Jaor
Gae kuntj keze vör allein ’t mêrge- en/of ’t middigprogramma.
D’r zeen vör uch heej gein köste aan verbonge.
Neemtj plaats in ’t roeëje pluche en geneetj! Vae zeen uch gaer op 23 mei in Zitterd.
Uutbîngel Declamatiewédstriêd 11 aprîl 2026
De jaorlikse Declamatiewédstriêd van Veldeke Wieërt leêverdje op zaoterdigmiddig 11 aprîl oppernoets e gewêldjig bewiês van waat ‘t Wieërter Lând aan dialect in hoês hieët. Zieëker inne now generatie van schoeëlgaondj joonk vôlk.
De groeëte zaal van Keenter Hart zoot weer bomvôl en det maakdje dette wichter van 6 wis 12 jaor ’t beste uut eurzelf haaldje métte prizzentatie van zelfgekoeëze of zelfs zelfgemaakdje gedichte.
D’n uutbîngel waas as volgtj:
Groep 3/4 1e priês – Alice Ogier mét ‘Stappe’ IKC Leuken
2e priês – Eline van Velthoven mét ‘Oeës Mack’ Bredeschool Moesel
3e priês – Jule Maes mét ‘Mien bóks’ De Firtel Stramproy
Groep 5/6 1e priês – Evi Prijs mét ‘Parfum’ De Schrank Ospel
2e priês – Milan Overheul mét ‘D’n Haan’ IKC Leuken
3e priês – Kiki Jacobs mét ‘Belle blaoze’ Kindcentrum Altweerterheide
Groep 7/8 1e priês – Jamie Ogier mét ‘D’n Haan’ IKC Leuken
2e priês – Aivi van Gansewinkel mét ‘As ich later groeët bin’ OBS Molenakker
3e priês – Fleur van Bilzen mét ‘Oeës knienke’ De Firtel Stramproy
‘ne Bezûndjer geslaagdje middig dus.
De nummers 1 en 2 van edere groep moge mejdoon aanne Limburgse finale dae dit jaor ouch te doon és in Wieërt, en waal op zaoterdig 6 juni a.s. in Keenter Hart.
Völ dânk aan Ralph Wulms en jurylede Ton Thijssen, Yvonne Vaes-Lucas, Brenda Wijen-van Lierop en Frits Nies.
Algemeine ledevergadering: 24 mieërt 2026 in Cwartier
| Algemeine Ledevergadering 24 mieërt 2026 |
Inne Algemeine Ledevergadering és uutbreî-jing van ’t besteur aangekaartj. De lede hebbe d’r mét ingestumdj det Rob Hermans en Frits Nies towtreî-je. Diëze léste és medein ouch ozze nowwe vuuërzitter; oppe stool dae vacânt woor vanaaf det Jan Feijen in januari 2024 és oeëverlieëje. Os besteur bestieët wieter uut Toos Hompes (sikkretaris), Wilhelmien van Houten (penningmeîster) enne lede Lee Timmermans en Naud Aendekerk. Wieter hieët sikkretaris Toos Hompes mét ’n powerpointprizzentatie ‘nen trökblik gegaeve op ’t jaor 2025. Aansloeëtendj hebbe ve besproeëke waat vör dit jaor ammaol oppe rol stieët en zeen de siêfers geprizzentieërtj doeër Wilhelmien van Houten. ‘Platvorm’ : Wieërter vereineginge métte gemeindje in gesprek oeëver ‘És Wieërt nog êrges…?’ op 15 september 2025 beej Antje van de Statie. Aansloeëtendj aanne vergadering geuftj Frits Nies ’n korte laezing mét bieëldje ter herinnering aanne Wieërter kûnstschilder Jan Tullemans dae ve dieës maondj al 15 jaor mótte misse. |