Declamatiewédstriêd

Um ’t dialect of ânger êrfgood in stând te haoje mójje de jeugd d’rin betrékke. Daorum schriêve vae vanaaf 1993 jaorliks ‘ne wédstriêd uut vör basisschoeële. Mét ’t vuuërdrage van zelfgekoeëze gedichte kunne de wichter perbieëre um inne priêze te valle en mej te doon aanne groeëte Limburgse finale.
Umdet ve hieël benoedj wore nao ’t gebroêk van dialect onger de jeugd dieëje ve in 1990 ’n ongerzeuk op alle basissschoeële inne regio Wieërt. De uutkomst daovan woor det in Wieërt-stad zoeëwat 62% vanne jóngere nog dialect kaldje. Inne boeteni-jje en Ni-jwieërt en Rooj woor det zoeëwat 80%.

‘Preuve’

’t És de vaste jaoraafsloêting van Veldeke Wieërt gewoeëre in december: PREUVE.
Det és ‘n dialectprogramma op ‘ne zoondig roond ’t middigoor mét hieël völ meziek, vuuërdrachte en lekker hepkes. Dieës activiteit hieët ’n vaste plaats gekrieëge in ’t jaorprogramma en völ lede kieke dao nao uut. ‘ne Gezellige middig um ’s beej te kalle.

Cursus ‘Wieërtlands Laeze & Schriêve’

Misschien waal ein vanne mieëst bekindje activiteite, en de activiteit woeë vae eders kieër now lede vanuut moge verwelkaome. ‘t Lieëre laeze en schriêve in ‘t Wieërtlands, woeë dejjae lieërtj schriêve waat dejjae zégktj. Want good schriêve begintj mét good loêstere.

Schriêverskrînk

Naeve ‘t gesproeëke dialect és ouch ‘t schriftelik uutwissele van tekste hieël belangriêk. Veldeke Wieërt és daomej begosj inne gouwen tiêd vanne Veldeke Literatuurpriês roond de ieëwwisseling. Opzet waas um dialectschriêvers te stimelieëre um proza en poëzie in dialect te bliêve schriêve. D’r waas in daen tiêd al ‘n hieël arsenaal van minse di-j kwalitatief good dialect schrieëve. Minse wi-j Welly van Nieuwenhoven, An Cuijpers, Liza Hompes, Sjra Vossen, Mia Frenken en Ton Bijsterveld zörgdje d’rvör det tiêdschrift ‘t Trûmperke mekkelik vôl kwoom.

De schriêverskrînk és nog altiêd doondje. Um de 6 tot 8 waeke kaome daelnemers beejeîn um same te kieke nao now stökskes dialect di-j eder mejbringtj um aan deindânger vuuër te laeze en te bespraeke. ’t És  gein verplichting um ederskieër wat noets te hebbe, mer det häölptj waal. De köste zeen bepêrktj: zaalheur en edereîn zien eîge drînke. ’t És ‘n win-winsituatie want de schriêvers hebbe d’r lôl aan en ‘t levertj ‘nen hieëlen houp gooje literatuur op.

Dialectwédstriêd

Alle dialectschriêvers uut Nederlands en Bêls Limburg uutdage um now wêrk te bliêve schriêve. Det waas de rieëje um in 1982 te starte mét ‘ne wédstriêd vör proza en poezie, toen nog de ‘Veldeke Poëziepriês”, noow ónger de naam ‘Dialectwédstriêd’.

De belangstélling daovör gruudje métte jaore. Bekindje name zoeëwi-j oeës eîge Annie van Gansewinkel wore oeëts winnaar.

De dialectwédstriêd stieët oeëpe vör ederein inne regio Midde-Limburg dae schrieftj in e regionaal dialect.

Vör mieër informatie verwiêze vae uch nao: NOETS.