Inne Algemeine Ledevergadering és uutbreî-jing van ’t besteur aangekaartj. De lede hebbe d’r mét ingestumdj det Rob Hermans en Frits Nies towtreî-je. Diëze léste és medein ouch ozze nowwe vuuërzitter; oppe stool dae vacânt woor vanaaf det Jan Feijen in januari 2024 és oeëverlieëje. Os besteur bestieët wieter uut Toos Hompes (sikkretaris), Wilhelmien van Houten (penningmeîster) enne lede Lee Timmermans en Naud Aendekerk.

Wieter hieët sikkretaris Toos Hompes mét ’n powerpointprizzentatie ‘nen trökblik gegaeve op ’t jaor 2025. Aansloeëtendj hebbe ve besproeëke waat vör dit jaor ammaol oppe rol stieët en zeen de siêfers geprizzentieërtj doeër Wilhelmien van Houten.

‘Platvorm’ : Wieërter vereineginge métte gemeindje in gesprek oeëver  ‘És Wieërt nog êrges…?’ op 15 september 2025 beej Antje van de Statie. 
Leef Limburgs: hertaling cursusmateriaol Leef Limburgs van ‘t Remundjs (!) nao ‘t Wieërtlands naojaor 2025.
200 Jaor Zuid-Willemsvaart: now planne vör 2026 in  samewêrking mét De Aldenborgh vör herdînking van 200 jaor De Knaal in Wieërt. Haodj de media inne gate.
100-jaorig bestaon Veldeke Limburg: Veldeke op paad!  Veldeke op paad es ‘ne Roadshow, deut allerlej plaatse aan in Limburg en keumtj ouch in Wieërt. Det stieët te gebuuëre op 2 mei 2026.

Aansloeëtendj aanne vergadering geuftj Frits Nies ‘n korte laezing mét bieëldje ter herinnering aanne Wieërter kûnstschilder Jan Tullemans dae ve dieës maondj al 15 jaor mótte misse.