Dialectcursus Laeze en Schriêve

Nao jaore van noeëdgedwoonge stilstând és inne persoeën van drs. Frits Nies, as opvolger van drs. Jan Feijen weer ‘ne ‘meîster’ gevoonge dae hert hieët vör ’t dialect.
De ieërste serie cursusaovendje inne nowwe opzét woor zieër geslaagdj. Daorum gieët Veldeke Wieërt wieter op dieëzen ingeslage weeg.

De cursus van zés lesse és vör edereîn dae de basis wiltj lieëre van ‘t laeze en schriêve in ‘t Wieërtlands dialect. De cursusaovendje zeen in ’t vuuërjaor oppe woonsdig en in ’t naojaor oppe dieënsdig. Ze waere gegaeve in e léslokaal van Keenter Hart, Sint Jozefskerkplein 3 Wieërt.

Inne cursus waere de spelling en grammatica gebroêktj, zoeëwi-j opgenoeëme in oeës hendjige naoslaagwêrk uut 2023: Nog neet uutgekaldj – Woeërdeliêst van ’t Wieërtlands dialect. Dit book weurtj inne cursus gebroêktj. Nao aafleêvering aan ‘t indj vanne cursus van eur eîge Meîsterwêrk krieje as deîlnemer ‘n officieel Getuûgschrift van Veldeke Wieërt.

Hejje interesse, meldj uch dan aan via mailadres info@veldekewieert.nl en gae kriegtj per umgaondje alle wieter informatie.

Dialectcursus good aangeslage

Um verschillendje rieëje waas ’t e paar jaor neet muuëgelik um ‘ne cursus te gaeve. De wachtliêst gruudje en gruudje. Dit jaor stong alles weer inne steigers um te beginne.


Oonger leî-jing van Frits Nies gînge 17 leefhebbers, joonk en aod, indj mei enthousiast van start. Detj aansloog bewiêsj waal ‘t feit detter zelfs daelnemers wore uut Tilburg en Haarlem!
 
 

Dieënsdigaovendj, 2 juli, waas de fieëstelike aafsloêting in Keenter Hart woeëbeej de cursiste eur ‘meîsterwêrk’ prizzentieërdje en daonao eur getuûgschift krieëge.

Ze wore allemaol êrg te spraeke oeëver de cursus.
 
 

’t És de bedoeling um in ’t naojaor weer mét ‘ne nowwe groep van start te gaon.
 
 

Aanmelde moog al via de mail: info@veldekewieert.nl

Wichterbook Veldeke Wieërt

Dootj eur wichter e plezeer!

Weem dörftj..?

Veldeke Wieërt gieët oppernoets e wichterbook uutgaeve. Det és in 2003 ouch gebuuërdj, mer destiêds allein um uut vuuër te laeze aan (klein)kîndjer. Noow mót ‘t e book waere woeë de wichter ouch zelf in kunne laeze, mer gae moogtj d’r neteurlik ouch uut vuuërlaeze.

Dootj mej!

Ieërst mer de verhäölkes vör ’t book verzamele. Edereîn dae zich gerope veultj, kân en moog zelf ‘n beejdrage levere. Schrieftj det van uch op (‘t moge d’r ouch mieër zeen) en mailtj/steurtj ‘t nao Veldeke Wieërt. Vae kieke alle inzendinge nao en make ‘n selectie vör in ‘t book.

Woeë mójje aan voldoon:

· schrieftj in e Wieërtlands dialect (Wieërt, Ni-jwieërt en Ospel);

· geschiktj vör wichter tot 10 jaor;

· maksimaal 500 wuuërd per verhäölke; · maile nao info@veldekewieert.nl;

· per post nao: Veldeke Wieërt, Beatrixlaan 52, 6006 AK Weert

· vermeldj eur persuuënlikke gegaeves d’rbeej;

· insteure vuuër 1 september 2024.

Kiektj ouch op Facebook (facebook.com/veldekewieert), Instagram (@veldekewieert) of de website: www.veldekewieert.nl

Vör wieter informatie: tillefoon 06-10081699.

Volop klasjenieëre

’t Waas gezellig drök inne Brouwschuur beej ’n now activiteit van Veldeke Wieërt: klasjenieëre.

D’n opzét waas ‘ne ongedwoonge aovendj woeëbeej aafwisselendj minse vanne vaste Schriêverskrînk van Veldeke zich prizzentieërdje mét eîge wêrk en lang pauzes um ongereîn te kunne ‘buurte’. De reacties wore hieël positief, zoeëwaal oeëver de ongebroêkelikke umgaeving as oeëver de talige prizzentaties.

’t Groeëte assortimênt aan drânke uut eîge brawweri-j droog dao zieëker aan beej.

Vör herhaling vatbaar.

Declamatiewédstriêd-finale 25 mei in Gelaen.

Op zaoterdig 25 mei waas de provinciaal finale vanne Declamatiewédstriêd 2024 in Gelaen.

Veldeke Wieërt waas in alle groepe vertieëgewoeërdigdj mét de towgestânge 2 daelnemers.

Ze wieërdje zich hieël good en in groep 5/6 haaldje Jamie Ogier van IKC Luuëke zelfs ‘n 2e plaats.

’ne Dikke proficiat és op zien plaats vör Jamie mét zien aojers en de begeleiders vanne schoeël.

Jaorvergadering 16 aprîl 2024 inne Hoêskamer

’t Waas weer hieël wat ângers dits kieër, de jaorvergadering oeëver ’t verloup van 2023.
In ’n now umgaeving; theaterkefee De Hoêskamer. Ve troffe ’t neet want ’t waas hongswaer op 16 aprîl en de minse di-j toch gekaome wore verdeendje ’n dik komplemênt en ’t veuldje binne drek létterlik en figuurlik wêrm aan.
Waarnemendj vuuërzitter Naud Aendekerk oeëpendje de vergadering mét e welkomstwoeërd. Bestuurslid Myrthe Peeters waas verhinderdj. Daonao krieëg sikkretaris Jan Moonen de microfoon um in woeërd en bieëldj ’t aafgeloupe jaor nog ’s in herinnering te rope. Belangriêkste waopenfeit: ’t uutbrînge van oeës now book “Nog neet uutgekaldj”.
Penningmeîster Leo Kwaspen leet op ziene balâns zeen det ve aevegood neet ermer zeen gewoeëre.Vervolges goof de vuuërzitter in groeëte liêne aan woeë ve mej aanne gang zeen.
– Kort heejnao op 20 april de Declamatiewédstriêd woeë weer flînk belangstélling vör és, vörâl vanuut de schoeële inne boeteni-jje.
– Indj mei ‘nen aovendj ‘klasjenieëre’.
– Mét behölp vanne Schriêverskrînk en spontaan beejdrages uut ’t publiek verhaole vertélle.In plaats van ‘ne Poëziepriês ‘ne nowwe wédstriêd vör wichterverhäölkes. Dao uut wille ve materiaol hale um e sprookjesbook same te stélle.
– Musici zeuke um lidjes (now of bestaondje) te vertale in ’t Wieërts um ‘ne lidjesaovendj te haoje.In september/oktoeëber wi-j gebroêkelik ’n uutstepke.
– Doeër ’t intensiever gebroêk vanne now website en Facebook de lede gauwer informieëre oeëver waatter keumtj en gebuuërdj és. Det léste pûnt és de rieëje woeërum ’t bestuur besloeëte hieët um geîn Trûmperke mieër uut te gaeve (wieter towlichting heejoeëver in ’n apaart stökske in dieëze Noetsbreef). 
Belangriêkste noets van dieëzen aovendj waas de aankondiging det ve de cursus Laeze en Schriêve weer op kunne starte. Inne persoeën van Frits Nies hebbe ve ‘nen opvolger gevoonge vör oeëze helaas gestôrve ieëre-vuuërzitter/docênt Jan Feijen. D’r és nog ‘ne lange wachtliêst van aanmeldinge dus ve kunne vuuëroet. Daomej sloeët de waarnemendj vuuërzitter dieës gezellige vergadering en blieëve de gaste nog ’n hieël poeës naoborrele.

Declamatiewédstriêd – 20 aprîl 2024

Dialect laeftj!

In ‘n bomvôl Keenter Hart leverdje wichter vanne basisschoeële uut de regio zaoterdigmiddig ‘t bewiês det ‘t dialect nog springlaevendj és. Inne doeër Veldeke Wieërt georganizieërdje Declamatiewédstriêd prizzentieërdje 23 wichter zich in ‘n echte dialectshow.

Verklédj of mét attribute, ‘t waas ‘n löst vör oug en oeër. De jury kwoom nao ‘n stieëvige discussie tot de volgendje uutslaag:

Groep 3 en 4:

1e plaats Teun van Meijl van IKC Leuken

2e plaats Isa Lamerichs van De Schrank, Ospel

3e plaats Lorin Timmmermans van IKC Leuken

Groep 5 en 6:

1e plaats Jamie Ogier van IKC leuken

2e plaats Aivi van Gansewinkel van OBS Molenakker

3e plaats Esmee Hoeben van De Firtel, Stramproy

Groep 7 en 8:

1e plaats Noor Kessels van De Schrank, Ospel

2e plaats Fionne Heldens van IKC Budschop

3e plaats Floor Veugen van IKC Budschop

 

De 1e en 2e priêswinnaars moge mejdoon aanne Provinciale finale op 25 mei in Gelaen.

 

In memoriam Jan Feijen

Béste minse,

Vae beginne ’t jaor in mineur. Intern wiste vae allang detj neet good ging mét de gezoondheid van oeëze ieërevuuërzitter; Jan Feijen. Nao e lânk gevecht hieët hae dieës werreldj, woeë hae zoeë völ van heel, motte achterlaote.

De verdeenste van Jan vör os en vör ’t Wieërter Lând zeen van onschatbaar waerde. Ziene groeëte kinnes van de regionaal dialecte hieët hae gelökkig vastgelagdj in dikke beuk, zoeëdet volgendje ginneraties heej nog volop van kunne profetieëre. Hae és ruum 20 jaor vuuërzitter van Veldeke Wieërt gewaesj en ouch zoeëlang hieëtte cursusse gegaeve um hoongerte minse beej te brînge wi-j ze eur dialect good koste schriêve. Zoeë lang asj mer effe ging és hae actief geblieéve binne oeës bestuur en leet zien meîning dudelik huuëre. ’t Zal vör os ’n hieël opgaaf zeen um dieës lieëg ruumdje op te völle.

Ve kunne noow allein mer verdreetig zeen, same mét zien femiêlie: Marly, Roel en Rose-Anne en de kleinkîndjer.Dette Jan de röst moog vînge di-j hae beej laeve noeëts gepaktj hieët.

Bestuur Veldeke Wieërt

Preuve mét Veldeke op 26 november 2023

Veldeke Wieërt slutj ’t jaor altiêd aaf mét e gevari-ieërdj muzikaal lunchprogramma.
Dit jaor zal det zeen op zoondig 26 november in zaal Don Bosco op Bosseve en begintj um 11.00 oor.
’t Weurtj drejvoudig PREUVE: aan dialect , aan gooje meziek en aan lekker hepkes tössedoeër.
Bekindje name zörge e geweldjig non-stop programma: Mark en Wilhelmien Fonteijn, Linda Smeets, Esther Snijders, Gerwine Saelmans en Wil Brouwers, Noah Veltrop, enz.

Wildje ‘ne plezeerige zoondigmiddig mejmake schrieftj dan in vuuër 19 november doeër
€ 20,00 per persoeën oeëver te make nao IBAN-raekening NL53RABO 0156914352.
Tegeliêkertiêd eur aanmelding maile nao info@veldekewieërt.nl

Neet-Veldeke-lede zeen ouch van herte welkom um mét de vereîniging kinnes te make.

Har Sniekers wintj poëziepriês 2023

vlnr | Har Sniekers, Paul Caquelein, Marjan Kilkens

Op ‘ne sfeervolle finale-aovendj in ‘ne volle zaal van Keenter Hart woeërt de Veldeke Poëziepriês 2023 uutgereiktj. ’t Aantal inzendinge loog e stök hoeëger as beej de 1e editie in 2022. In totaal 27 schriêvers uut hieël Midde-Limburg steurdje 36 wêrke in.

Juryvuuërzitter Frits Nies vong detter in verhaojing völ gedichte beej wore mét e serieus thema; zikdjes, stêrve, enz. Hae advizieërdje um de humor neet uut ‘t oug te verleze.
’t Programma woeërt muzikaal opgeloesterdj doeër de geweldjige zang van Esther Snijders uut Rooj.
As aafsloêting maakdje vuuërzitter Giel Bruijnaers d’n uutslaâg bekindj.
Winnaar waas Har Sniekers uut Thoear mét ’t gedicht Aojershoês. Oppe 2e plaats kwoom Paul Caquelein uut Herte en de 3e priês ging nao Marjan Kilkens uut Haelen.

Op dieëze zieër geslaagdje aovendj woeërt de foonkelnow website van Veldeke Wieërt inne löcht gebrachtj.
De reacties wore hieël positief: kleurriêk, oeëverzichtelik en inclusief webshop.
Âl mét âl ‘ne topaovendj vör Veldeke.