‘Taal aanne knaal’. D’n uutbîngel vanne dialectwédstriêd 2026

‘ne Volle zaal beej De Hook oppe Beest kos op zoondigmiddig 4 oktoeëber d’n uutslaag mejmake vanne Dialectwédstriêd 2026 . Ruum 40 daelnemers uutte regio steurdje zoeën 50 verhaole en gedichte in  roond ’t thema 200 jaor Zuid-Willemsvaart : ‘Taal aanne Knaal’.

De jury, Mark Bouwmans, Maikel Deben, Geert Gabriëls en Koos Neijnens, haaj de taak um uut al di-j inzendinge de winnaars te keêze.

De 1e priês ging nao Bert Smeets uut Wieërt mét ‘Aanne knaal’.
De 2e priês waas vör Martijn Mennen uut Wieërt mét ‘Plat kindje vanne knaal’.
De 3e priês ging nao Jos Zonnevijlle uut St. Odiliënberg mét ‘Aan de kenaal’.

De prikkelpriês, aanmoeding vör telênt, woort uutgereiktj aan veer men vanne Vastelaovendjvereîniging ‘Zoêpe tot ve kroêpe’ uut Wieërt mét ‘As de knaal kos kalle’.

Boete dette winnaars eur  wêrk koste vuuërdrage, haaj de jury nog acht daelnemers uutgekoeëze um op ’t podium heur verhaol of gedicht vuuër te drage, zoeëwi-j de in Wageningen woeënendje Annie van Gansewinkel. Daonaeve brachte Geert Gabriëls, Brenda Wijen en Koos Neijnens as gastspraekers ounog e dialectverhaol.

Tössedoeër koste ve genete vanne meziek van Linda Smeets, Mark&Wilhelmien en Esther Snijders & Rolph Brouns. Dieëze middig kwome d’r ouch aoj bieëldje vanne knaal op ’t schêrm vörbeej en woorte d’r  korte films (samegesteldj doeër Jo van Geneijgen) vertoeëndj vanne Schieëpswêrf en vanne léste Brökwachter oppe statterbrök.  

‘nen Hieële zit, mer zieëker de meute waerd, zoeë voonge de minse inne volle zaal.

Vae dânke alle daelnemers, de jury, café-zaal De Hook, de muzikânte mer ouch Weerterlandhout vör ’t make vanne priêze.

Foto’s:  Theo van Winkel  Weertdegekste.nl  en Wes van Renswoude 

Schuuërkalender 2027 uutgereîktj

Schuuërkalender 2027 geprizzentieërdj en te koup

Beej de Veldeke Dialectwédstriêd zoondigmiddig 4 oktoeëber in Café-Zaal De Hook hebbe vae ouch de Veldeke Schuuërkalender 2027 geprizzentieërdj.

Besteurslid Rob Hermans reîkdje d’n ieërste kalender uut aan înkele bewoeëners vanne nowwe woeënvôrm oppe Beest van Stichting ZoGewoon. D’n twieëdje ging nao Wieërter loco-börgemeîster Peter Mols.

De Schuuërkalender van Veldeke Wieërt és vanaaf noow te koup vör € 17,50 beej
Warenhuis Conceptstore Beekstraat 54 Wieërt, Bruna Wieërt en Ni-jwieërt, Primera Oranjeplein Wieërt en Cigo van Bun Muntpassage 28 Wieërt. 

Lede en begunstigers kunne de kalender bestelle vör € 15,00. Steurtj daovör e mailtje nao ’t sikkretariaat info@veldekewieert.nl of beltj nao 0613 22 36 26.
De kalender kan dan aafgehaaldj waere op aafspraok.

Foto’s Wes van Renswoude    en  Theo van Winkel WeertdeGekste Weertdegekste.nl