‘Ne volle zaal beej café zaal De Hook oppe Beest kos op zoondigmiddig 4 oktoeëber de bekîndmaking mejmake vanne Dialectwédstriêd 2026 . Ruum 40 daelnemers uutte regio steurdje zoeën 50 verhaole en gedichte in roônd ’t thema 200 jaor Zuid Willemsvaart : ‘Taal aanne Knaal”.
De jury, Mark Bouwmans, Maikel Deben, Geert Gabriëls en Koos Neijnens kieëge de taak um uut al di-j inzendinge de winnaars te keêze.
De 1e priês ging nao Bert Smeets uut Wieërt mét ‘Aanne knaal’.
De 2e priês waas vör Martijn Mennen uut Wieërt mét ‘Plat kindje vanne knaal’.
De 3e priês ging nao Jos Zonnevijlle uut St. Odiliënberg mét ‘Aan de kenaal’.
De prikkelpriês, aanmoedingspriês, woort uutgereiktj aan veer men vanne Vastelaovundjvereîniging ‘Zoêpe tot ve kroêpe’ uut Wieërt mét ‘As de knaal kos kalle’.
Boete dette winnaars eur wêrk koste vuuërdrage, wore d’r nog acht daelnemers deej op ’t podium kwome mét eur verhaol of gedicht, zoeëas de in Wageningen woeënendje Annie van Gansewinkel. Ouch Geert Gabriëls, Brenda Wijen en Koos Neijnens verzörgdje ’n vuuërdracht.
Dao tössedoeër koste ve genete vanne meziek van Linda Smeets, Mark&Wilhelmien en Esther Snijders & Rolph Brouns. Ti-jjes de middig kwome bieëldje vanne knaal op ’t schêrm vörbeej en woorter e filmke (van Jo van Geneijgen) vanne Schieëpswêrf en vanne léste Brökwachter getoeëndj.
‘Ne lange zit mer zieëker de meute waerd.
Mét dânk aan alle daelnemers, de jury, café zaal De Hook en Weerterlandhout vör ’t make vanne prieëze.
Foto’s: Theo van Winkel 
en Wes van Renswoude 
