Resj os nog um uch herstikke plezeêrige Fieëstdaag te wînse in ’t vertrawwe uch volgendj jaor weer te zeen.

De nowwe Schuuërkalender vör 2025 és hieël good aangeslage. De léste doeëze vuuërraod waere inne kaomendje waeke geheidj verkochtj.
Zjuust vuuër ’t begîn van ’t now jaor hebbe ve nog wat noets te beeje waat heej good beej pésj. De lieërlinge vanne praktijkopleiding beej Het Kwadrant hebbe as experimênt ‘ne standaard bedachtj woeë de Veldeke-kalender precies op pésj. Hieël sûmpel ineîn te schuûve en herstikke praktisch. Hae kosj mer € 5,00 (excl. verzendköste van € 7,95!).
Gae kuntj dieëze standaard bestélle via oeëze webshop of rechtstreeks aafhale en contânt betale beej de sikkertaris op ’t adres: Beatrixlaan 52 in Wieërt.

’t Preuve és al jaorelânk ’n bezûndjer activiteit um ’t (Veldeke)vereînegingsjaor mét aaf te sloête. Op ‘ne zoondig roond ‘t middigoor kaome de leefhebbers beejeîn um te klasjenieëre, wat te drînke en hepkes te preuve. Dit jaor woor det op 8 december in ’t knusse achterzaelke van Dennenoord. D’r waas ieërder al besloeëte um ’t oeëver ‘nen ângere boeg te goeze: ânger ruumdje, ânger artieste, ânger hepkes.
D’n opzét vör verjonging slaagdje boetegewoeën. Stefan Wolter haaj de vreeje hând gekrieëge en verzameldje ’n aantal vanaods bekindje en now minse um zich haer en stoeëk daomej e zieër gevarieërdj programma ineîn van zang en vuuërdrachte van soms pakkendje proza en poëzie.
Det de kuuëkegarde van Dennenoord zich uutgestöktj haaj mét herstikke lekker hepkes maakdje ’t gehieël aaf. De daelnemers wore super enthousiast oeëver det waat ze geboëje krieëge.