Dialectwedstriêd op 11 aprîl 2026

Veldeke Limburg organizieërtj jaorliks de declamatiewédstriêd vör alle basisschoeële.
Veldeke Wieërt deut dao al jaorelânk aan mej.

Wichter van de groepe 3-4, 5-6 en 7-8 declamieëre gedichte in eur eîge dialect. De schoeël deut evt. zelf ‘n vuuërronde. Van eder kategeri-j moge drej wichter nao de (regionaal) halve finale. Dao stri-jje ze vör de priêze en vör twieë plaatse per groep inne Limburgse finale.

Laotj de wichter e gedicht uut oeëze gedichtebundel keêze, dae nao de schoeële és gesteurdj. ‘t És ouch muuëgelijk um zelf e gedicht te laote make (b.v. doeër de aojers), ouch daomét kunne ze mejdoon! Vae hoeëpe dejjae hêlptj um dit waerdevôl erfgood, oeës dialecte, te behaoje. Opgaeve kân tot uterlik 19 mieërt 2026 oppe schoeël of beej ‘t sikkretariaat van Veldeke Wieërt.

Preuve 14 december 2025

 

Beej os jaorliks ‘Preuve’, op zoondig 14 december in zaal Dennenoord, hebbe vae oeëzen aafgetroeëje sikkertaris Jan Moonen (Moeëne) óngerscheî-je as Ieërelid van Veldeke Krînk Wieërt.

Per 1 december hieët “Menieër Veldeke”, nao 47 jaor inzet vör vereîniging en besteur, ‘t sikkertariaat van Veldeke Krînk Wieërt oeëvergedrage aan besteurslid Toos Hompes.

‘t Woor zoondigmiddig in zaal Dennenoord ‘nen drökke óngereîn vör leefhebbers vanne Wieërtlandse streektaal. Zoeëwi-j beej eder aaflevering van ‘Preuve’ stóng ouch ditskieër weer ‘n schoeën kuuës aan dialectartieste uutte regio gerânt vör gewêldjige amezatie.

De artieste wore geregeldj doeër Mark Bouwmans van Wieërt Amezieërtj. ‘t Gehieël woort aaneîngekaldj doeër oeëze meîster Laeze en Schriêve Frits Nies.

‘t Zînge van Ton Wolter, Noa Veltrop, Esther Snijders & Rolph Broens (Just Take 2), Marion Ingeveld, Jan Schroijen & Fer Koolen (Boove Water) woort aafgewisseldj mét e paar gesproeëke dialecttekste. Óngertösse koste de minse inne zaal ouch preuve van verschillendje geservieërdje hepkes; âl in gezellige körstsfeer. 

Now lichting laezers en schriêvers van Wieërtlands

 

Veldeke Wieërt hieët ‘n waek nao de Elfdje vanne Elfdje ‘n volgendje lichting cursiste ‘t Getuûgschrift Wieërtlands Laeze en Schriêve bezörgdj. Alle deîlnemers aanne naojaorscursus krieëge dit officieel Veldekepepeer uutgereiktj doeëre ‘Meîster’, Frits Nies.

Zés dieënsdigaovendje achtereîn woeërte dieës cursiste neet allein beejgeschoeëldj inne léste now versie vanne Wieërtlandse spelling en grammatica. Ouch krieëge ze hej-op gelaeg umme basis aan te lieëre en zich baeter te bekwaome in ‘t laeze en schriêve van oeës dialect. “Neet ammaol aeve mekkelik”, zoeë zag ein vanne ‘geslaagdje’, “mer waal herstikke sjiek um te doon.”

Vuuërjaorscursus
Nao Vastelaovendj 2026 starte vae mét oeëze volgendje reeks, de vuuërjaorscursus Wieërtlands Laeze en Schriêve. Dieëze kieër op zés woonsdigaovendje, in ‘n cursuslokaal van Keenter Hart. Ieërdaags make vae de presieze data bekindj. Ajje noow al mieër wiltj wieëte en/of uch wiltj aanmelle, steurtj os dan efkes ‘nen e-mail: info@veldkewieert.nl

 

Jan Moonen; nao 47 jaor ésj good gewaesj, vingtj Jan.

Jan Moonen; nao 47 jaor ésj good gewaesj, vingtj Jan

Jan-2

Menieër Veldeke, ‘Mister Veldeke’ : JAN.

Jan Moonen (Moeëne), ‘nen doeërgewînterdje Wieërter jóng, platkaller, platschriêver én “Menieër Veldeke”.

Altiêd doondje mét oeës wieërts, daonaeve e bitje mét ‘t Mannekoeër en neteurlik mét ziê vraw Leidi. Mer vörâl mét Veldeke dus. Hae aomtj Veldekes, droumtj Veldekes, fietstj Veldekes, itj Veldekes, drînktj Veldekes… Tössedoeër bringtje de te verkoupe beuk en schuuërkalenders van Veldeke nao de wînkels. De minse di-j gein e-mailadres hebbe, kriêge van Jan alle post nog aojerwets inne brevebös.

Veldeke…
Jan stieëter mej op en gieëter mej nao… Ounein, dés mét Leidi.
Mer boeëvenâl és Jan ‘t gezicht van Veldeke Wieërt.

Altiêd drök gaondje mét en beej activiteite zoeëwi-j de Dialectwedstriêd, Klasjenieëre, Preuve, de Poëziewedstriêd, de Schriêverskrînk…
Hae deej de redaksie van ’t Trûmperke, waas vanaaf d’n ieërsten daâg betrokke beej ‘t make van âl oeës beuk, én in 2018 észe beneumdj tot ieërelid van Veldeke Limburg.

Daobeej maaktj hae ouch same mét Lee Timmermans de Veldeke Schuuërkalender en hultje ‘n uigske in ‘t zeîl beej de dialectcursus Laeze en Schriêve aszet umme sênte gieët.
Én, Jan kintj alle name vanne lede van Veldeke Wieërt uutte bloeëte kop.

Mer noow, nao 47 jaor ésj good gewaesj, vingtj Jan. Hae gieëter mej stoppe. Det wiltj zegke, mét ‘t besteurssikkertariaat. Neet mét Veldeke.
Jan zâl geheidj nog völ plat bliêve kalle, dînke, zînge, schriêve en klasjenieëre, mer ‘t sikkertariaat dreugtje noow, per 1 december, oeëver. 

Tés tiêd, tés verbeej, tés gedaon…. ♫ ♭ ؂♪ ؂ ♬ ♭
mer vae zeen Jan as Veldekemân pur sang nog déks en gaer trök.

Hieël êrg bedânktj zegke vae noow vast 
as besteur van oeëze Veldekekrînk,
Lee Timmermans, Naud Aendekerk, Toos Hompes, Wilhelmien van Houten.

Preuve mét Veldeke Wieërt op 14 december 2025

Preuve mét Veldeke Wieërt.

‘t És te doon op zoondig 14 december beej zaal Dennenoord aanne Iêzere Mân.Vae beginne um 11.00 oor en sloête aaf roond 14 oor.

Ouch dieëze kieër prizzentieëre vae weer ‘n oeteînloupendj dialectpregramma mét zang en vuuërdracht.
Ónger ângere van Esther Snijders (bekindj vanne musical Antje) en Rolph Brouns, Boove Water (Jan Schroën en Fer Koolen), Noa Veltrop en Marion Ingeveld (kuuënegin Wilhelmina inne musical Antje).
Tössedoeër kunne ve neteurlik preuve vanne lekker hepkes van Marc en Els Creemers van Dennenoord.

De köste vör lede zeen net as vuuërgaondj jaor € 22,50. Vör ‘nen introducé ésj € 25,00.
Gaer oeëvermake oppe Veldeke IBAN-raekening NL 53 RABO 01569 14352.

Wildje ‘ne schoeëne zoondig roond de middig mejmake, schrieftj uch dan bi-jtieds in.

Betaling van ’t bedraag és inschriêving.
Zetj d’rbeej mét wi-jvöl persoeëne, dan és eur plekske beej Dennenoord gerizzervieërdj.

Vae staon klaor!

 

Veldeke Wieërt Schuuërkalender Jaor 2026

Nowwe schuuërkalender vör 2026.

‘t Ieërste exemplaar vanne schuuërkalender 2026 és op 3 november officieël aangeboeëje aan wéthaojer Susan Winters en és noow oppe mêrrentj. Foto’s Weert de Gekste & Nederweert24.

Inne vertrawdje uutveuring mét aldaag e gezagdje, de vertaling en e woeërd vannen daâg. 
Beej edere nowwe maondj e schoeën wichtergedichtje uut ’t bestând det ve gebroêke vörre Veldeke Declamatiewédstriêd oppe basisschoeële.

De kalender hieët doeër de jaore ’n vaste plaats veroverdj in hieël völ Wieërter hoêshaojes. Inne gezagdjes zitj dék leid of humor opgesloeëte.
Vör e klein bedraâg hejje e jaor lânk de laeveswiêsheid aanne moor hânge of oppe taofel ligke.

De kalenders ligke beej de volgendje bookhândels/wînkels:
Bruna Wieërt (Mêrrentj), Bruna Gommans Ni-jwieërt (Lambertushof), Warenhuis Conceptstore Wieërt (Bieëkstraot), Cigo van Bun Wieërt (Muntpassage) en Primera Wieërt (Oranjeplein).

De priês és € 15,00.

(De kalender és via de webshop uutverkochtj.)

Now laesbukske – Wichterverhäölkes uut ‘t Wieërterlând

Naeve oeës bekindje activiteite, zoeëwi-j de cursus Wieërtlands Laeze en Schriêve, de Declamatiewédstriêd vör basisscholieëre en neteurlik ouch Klasjenieëre, de Poëziepriês en Preuve, doon vae os bést um oeës kekke en kuûkes aan te spraeke. Oftewaal, de jóngluj, wichter tot ‘n jaor of twelf.

Um di-j rieëje hebbe vae e now laesbukske samegestéldj det as titel dreugtj: Wichterverhäölkes uut ’t Wieërter Lând. Bestumdj vör wichter tot ca. 12 jaor.
Vör de kleinste um zich uut te laote vuuërlaeze doeër pap, mam, opa en/of oma en vör de wat aojer um zelf in te laeze.

Schriêvers uutte regio zeen genuuëdj um heejvuuër now verhäölkes te bedînke. Det leverdje völ schoeën materiaol op en dao hieët ‘ne wêrkgroep ‘n kuuës van 17 verhäölkes uut gemaaktj um op te neme in dit bukske.
’t És ‘n amezânt gehieël van 75 pagina’s gewoeëre dejje kuntj koupe beej de bookhândel inne umgaeving vör € 19,50.

 

Klasjenieëre donderdig 19 juni beej Wieërter Stadsbrawweri-j

 

Klasjenieëre 2025

In 2024 hebbe vae vör de ieërste kieër ’n “klasjenieëre” gehaoje en det waas good geslaagdj.

Vae hebbe dit ouch weer vör 2025 opgepaktj en op donderdig 19 juni zeen ve weer beejeîn gekome inne Wieërter Stadsbrawweri-j ‘De Brouwschuur’  Parallelwieëg 143, Wieërt.

Vae hebbe geloesterdj nao deindânger, nao vuuërdrachte in det schoeën dialect
van oeës Wieërterlând en neteurlik geklasjenieërdj.
En genoeëte van ‘n lekker glaas beer,  wiên of wat ângers en e klein hepke huuërdje d’r ouch beej.

Det gaon ve aanhaoje.

Fieëst vanne Moôdertaal -12 aprîl 2025

Op zaoterdig 12 aprîl waas de 18e declamatiewédstriêd van Veldeke Wieërt. in ein bomvôl Keenter Hart koste wichter van 6 tot 12 jaor vanne Wieërter schoeële zich prizzentieëre mét ‘n eîge gekoeëze of zelfgemaaktj gedicht.

Groep 3/4
1e plaats Alice Ogier van IKC Luuëke
2e plaats Teun van Meijl van IKC Luuëke
3e plaats Pip van Horne van De Firtel, Rooj

Groep 5/6
1e plaats Saar Vanlier van De Schrank, Ospel
2e plaats Lorin Timmermans van IKC Luuëke
3e plaats Lieuwke van der Pol van OBS Molenakker

Groep 7/8
1e plaats Aivi van Gansewinkel van OBS Molenakker
2e plaats Esmee Hoeben van De Firtel, Rooj
3e plaats Anne Peerlings van OBS Molenakker

De nummer 1 en 2 van edere groep moge mejdoon aanne provinciale finale op 24 mei in Echt.


Jaorvergadering – 01 aprîl 2025

Inne jaorvergadering van 1 aprîl kwoom e gevari-ieërdj bieëldj nao vuuëre van oeëze krînk. Umdet ve nog altiêd op zeuk zeen nao ‘ne nowwe vuuërzitter noeëm Naud Aendekerk di-j functie nog ‘ne kieër waar.
De jaoroeëverzichte woeërte geprizzentieërdj en akkoeërd bevoonge.

’t Zwaorste agendapûnt woor de bestuursaanvölling.Inne loup van 2024 zeen, o.a. um gezoondheidsrieëje, e paar bestuurslede vertrokke. Gelökkig és ’n stieëvige aanvölling gevoonge inne persoeëne van Toos Hompes (Wieërt) en Wilhelmien van Houten (uut Ni-jwieërt). Toos gieët zoeëvöl muuëgelik sikkretari-ieël wêrk oeëverneme en Wilhelmien wiltj as penningmeîster aanne gang. Daomej és ’t bestuur weer e bitje op stêrkdje mer ’t gemis van ‘ne vuuërzitter leutj zich veule.

Cultuurhistoricus Alfons Bruekers uut Ni-jwieërt goof nao de pauze ’n prizzentatie mét as óngerwêrp: “De Fossa Peellandia”. Edereîn weît ’t te ligke, de kanaleveersprong woeë de Zuid-Willemsvaart, de Noordervaart en kanaal Wessem-Ni-jwieërt beejeîn kaome mét ’t ‘Eilandje’ inne midde. Heej és bliêkbaar al e begîn mej gemaaktj inne Tachtjigjaorige oeërlog.