Declamatiewédstriêd

Um ’t dialect of ânger êrfgood in stând te haoje mójje de jeugd d’rin betrékke. Daorum schriêve vae vanaaf 1993 jaorliks ‘ne wédstriêd uut vör basisschoeële. Mét ’t vuuërdrage van zelfgekoeëze gedichte kunne de wichter perbieëre um inne priêze te valle en mej te doon aanne groeëte Limburgse finale.
Umdet ve hieël benoedj wore nao ’t gebroêk van dialect oonger de jeugd dieëje ve in 1990 ’n ongerzeuk op alle basissschoeële inne regio Wieërt. De uutkomst daovan woor det in Wieërt-stad zoeëwat 62% vanne jóngere nog dialect kaldje. Inne boeteni-jje en Ni-jwieërt en Rooj woor det zoeëwat 80 %.

‘Preuve’

’t És de vaste jaoraafsloêting van Veldeke Wieërt gewoeëre in december: PREUVE. Det és ‘n dialectprogramma op ‘ne zoondig roond ’t middigoor mét hieël völ meziek, vuuërdrachte en lekker hepkes. Dieës activiteit hieët ’n vaste plaats gekrieëge in ’t jaorprogramma en völ lede kieke dao nao uut. ‘ne Gezellige middig um ’s beej te kalle.

Cursusse laeze en schriêve in ‘t dialect

Misschien waal ein vanne mieëst bekindje activiteite, en de activiteit woeë vae eders kieër now lede vanuut moge verwelkaome. ‘t Lieëre laeze en schriêve in ‘t Wieërlands, woeë dejjae lieërtj schriêve waat dejjae zégktj. Want good schriêve begintj mét good loêstere.

Schrieverskrînk

Naeve ‘t gesproeëke dialect és ouch ‘t schriftelik uutwissele van tekste hieël belangriêk. Inne pré-coronatiêd bestóng d’r ‘ne actieve Schriêverskrînk Wieërter Lând. Daelnemers kwome regelmaotig beejeîn om now wêrk aan deindânger te prizzentieëre. Dék woeërte van heejuut tekste in verschillendje media geplaatsj. In ‘t streve um de dialecte in stând te haoje és Veldeke Wieërt altiêd op zeuk nao minse di-j regelmaotig proza of poëzie in eur eîge dialect wille schriêve.Vör mieër informatie of inschriêve kujjae maile nao: info@veldekewieert.nl

Klassjenieëre

‘ne Gezellige middig um ’s beej te kalle

Literatuurpriês:

Alle dialectschriêvers uut Nederlands en Bêls Limburg uutdage um now wêrk te bliêve schriêve. Det waas de rieëje um in 1982 te starte mét ‘ne wédstriêd um de Veldekepriês vör proza en poezie. De belangstélling daovör gruudje mét de jaore. Bekindje name as Frits Criens uut Haelen, Jo Caris uut Maastreecht, Herman Bors uut Reuver en oeës eîge Annie van Gansewinkel wore oeëts winnaar. In later jaore zoog ‘t Hoeëfdbestuur van Veldeke de waerde in van dieëze wédstriêd en ongerstuuëndje dae mét subsidies.