De boum
Hae stieët al jaore langs de wieëg
Waat és hae groeët gewoeëre
Toch waas ’t vreuger mer ’n speêr
Wi-j hae pas waas geboeëre
D’r keumtj eder jaor ’n hieël stök beej
En as hae stieët te zonne
Dan ésj toch ‘nen hieële knaap
En toch ouch mét niks begonne
Mer de zon di-j schientj heej neet zoeë dék
En as de wîndj ‘m good kân rake
Dan buigtj hae alle kânten op
En huuërdje ‘m soms krake
Soms zitj d’r ouch e néstje in
’t Begîn van weer now laeve
Hae héltj zien blaar dan docht beejeîn
Um beschêrming te gaeve
As dan nao waeke raengelwaer
Zien tek nao oonger hoonge
Dan zeen ich ‘m dînke aan âl di-j hung
Di-j op drej puuëj vuuër ’n stoonge
Ineins dan weurtj hae aafgekaptj
Dan ésse wul verslieëte
’t Groeëtste dael weurtj opgestoeëktj
De rest weurtj wéggesmieëte
Zoeë gieët ’t mét os minse ouch
Ge waertj kroomp en gaotj wat hânge
Oeteindelik waerdje plat gelagdj
Ge hetj lang genóg gestânge!
Jos Stultiens, Wieërt
