Noetsbreef 1 – 2023
Vereîniging tot instândhaojing van volkscultuur en dialecte
Sikkretariaat: Beatrixlaan 52, 6006 AK Weert
N O E T S B R E E F 1 – 2023
Béste lede en begunstigers,
Vuuëraafgaondj aanne gezellige Preuve-middig op zoondig 11 december hebbe ve ’n korte ingelaszje ledevergadering gehaoje um formeel 4 now bestuurslede vuuër te drage. Gelökkig wore d’r gein obstakels en woeërte ze alle 4 beej acclamatie gekoeëze. Daonao mos oeëver de nowwe vuuërzitter gestumdj waere en ouch dao wore de lede ’t unaniem oeëver eins. Zoeëdoondje kos Jan Feijen mét e gerösj hert de vuuërzittershamer oeëverdrage aan de nowwe vuuërzitter Giel Bruijnaers.
Ve hebbe toen beloeëfdj det de now bestuurslede zich nog uutgebrédjer zoeëje vuuërstélle en det doon ve via dieëze Noetsbreef.
Beej dieës gelaegenheid ouch ’n dânkwuuërdje van Nelly Haenen-van den Berg as aaftreî-jendj bestuurslid en van Jan Feijen as aod-vuuërzitter.
Vae make in döbbel opzicht ‘ne nowwe start: e now jaor mét e now bestuur.
Heejoonger prizzentieëre vae gruuëts de now bestuurslede:
(Oppe foto van leenks nao rechs) Giel Bruijnaers, Myrthe Peeters, Naud Aendekerk en Leo Kwaspen.
Efkes veurstélle; Giel Bruijnaers, Vuuërzitter
Ich bin 62 jaor geleeje in Wieërt op Luuëke geboeëre en getoeëge op Kieëntj en Fatima. Sieër 1992 woeën ich in Ni-jwieërt, ’t lândj van mien veuraojers. Ich mein dan ouch ’t béste van dees dialecte in mich te vereînige.
Miene boeëterham verdeen ich sieër 1979 beej de gemeindje Ni-jwieërt as kabinetschef. Ich haoj mich beezig mét representasie, recepsies, ontvangste en (kuuëninklike) ongerscheî-jinge. Daonaeve bin ich belasj mét ’t persenieëlsbeleid vanne gemeindje, arbeidscontracte en rechtspositie van ’t persenieël. Ouch bin ich ambtenaar vanne börgerlike stând en moog ich regelmaotig minse trawwe of eur partnerschap registrieëre.
Inne onecht doon ich det ouch eder jaor vör ’t Boorebroêdspaar vanne Pinmaekers Ni-jwieërt. 24 jaor lânk waas ich besteurslid en 14 jaor vuuërzitter van hermeni-j Sint Joseph, Ni-jwieërt. Daonaeve bin ich al verschillige jaore consul vör de Oorlogsgravenstichting.
Altiêd al heb ich bezûndjere aandacht gehadj vör oos moôdertaal en de volkscultuur. En wi-j belangriêk det és um te behaoje hoof ich uch as lid van Veldeke echt neet uut te légke.. Dao wil ich mich, same mét de ânger besteurslede en alle lede van Veldeke, gaer vör inzétte.
En noow mocht ich op 11 december 2022 Jan Feijen opvôlge as veurzitter. Ich bin d’r mich van bewusj detj groeëte schoon zeen um te völle. Det zal mich zeker neet lökke want Jan és waal ‘nen hieële bezûndjere mins mét enorm völ kinnes van oos Wieërtlands.
En dao ligktj ’n groeëte uutdaging di-j vae same en mét vertrawwe mét de lede van Veldeke aangaon. Vae hoeëpe ouch op ‘ne actieve inbring van eure kânt.
Ich wîns uch allemaol e gezoond en gelökkig 2023.
Giel Bruijnaers, vuuërzitter
Efkes veurstélle; Myrthe Peeters
Miene naam és Myrthe Peeters, 29 lentes joonk. Ich bin groeët gewoeëre oppe Bosseverbieëk, heb efkes ‘ne blawwe maondjig op Vrouwenhof gewoeëndj, en woeën awiel same mét miene vrîndj Tim en oeëze hoond Baerke op Boswaard (’t vuuërmalige MOB-complex). In ’t dageliks laeve verdeen ich m’n sênte as hoeësarts. In miene vreeje tiêd gaon ich gaer kui-jere mét d’n hoond, póngel ich wat in hoês of laes ich e good book. Wieter laef ich vör de vastelaovendj, dus bin ouch dék doondje mét ’t nejje van pèkskes, ’t oefene vanne schmînk of mét ’t rippetieëre vör de Boonte Femiêliemiddig vanne Rogstaekers. As ich dan nog tiêd oeëver heb, prebier ich te gaon sporte, vôlg ich stijldanslés en ri-j ich gaer paerd.
Same mét oeës mam heb ich de cursus Laeze en Schriêve gevolgdj beej Jan Feijen.
Oeës pap és van Aovert en mam van Ni-jwieërt. Ze hebbe mie zöster en mich in eur eîge plat opgeveudj, dus vae haaje al gaw inne gate det mam neet kaldje wi-j pap en ângersum. Det és neet êrg, det és de charme van oeës dialect, en ich bin mer wat gruuëts det ze dit op mich hebbe oeëvergebrachtj. Ich ving ’t belangriêk os Wieërter (en Wieërtlands) dialecte in ieëre te haoje. Ânger vînge det waal ‘s oeëverdrieëve, en neume mich dan ‘ne taalpurist. Mer ich bin ieërlik; as ich d’r al vör kân zörge det d’r ietskes minder ‘jullie’ gezagdj wuuërtj, bin ich al contênt, want det és um juuëk van te kriêge.
Weem wétj; wis gaw!
Myrthe
Efkes veurstélle; Naud Aendekerk
Béste minse,
Moog ich mich effe veurstélle, miene naam is Naud Aendekerk, officieel Arnoldus Hubertus Maria Aendekerk, roopnaam Arnaud veur de meîsters oppe lieëger sjool, daonao gewoeën Naud. In Rooj ouch bekindj as Naud vanne Waal, aodste zoon van Hub vanne Waal (Aendekerk) en Truus van Dobbele (Kunnen). Gebore en getoge op Breyvin, sinds 15 februari 1967 woeën ich dao nog altiêd. Nao de lieëger sjool in Rooj ging ich nao de ambachtssjool (LTS) in Wieërt om dao te lieëre vêrve en behânge en daonao in Eindhove mien vakbekwaomheids diploma ’s te hale. Vanaaf de stage tot noêw wirk ich bie schildersbedriêf Truijen in Rooj. Vêrve en behânge doon ich van Eijsde tot de Mookerhej mer meîstâl inne regio Wieêrt.
Asse roondj de vastelaovendj bis gebore den hebse meîstâl de smaak van lôl en plezeer snêl te pakke. Mien verjaordaags fieëstjes wore dan ouch dék verklédj. In 2010 waas ich as aojere broor adjudânt van Preens Niek 1ste vanne Heiknuiters in Altwieërt. Sinds toen bin ich dao lid vanne Raod van Elf. In 2016 vroge ze mich dao biêj de redactie vanne vastelaovendjgezét. Om dao good veur d’n daâg te kome heb ich de cursus Laeze en Schriêve gedaon. Op 13 november 2017 kreeg ich mien getuûgschrift en vanaaf daen daag bin ich lid van Veldeke, laes ’t Trûmperke, kiek ederen daâg oppe scheurkalender en bin der meîstâl bie as der get te doon is. Oppe veurléste ledevergadering vroge ze om now bestuurslede. Ich zag tege Jan:
‘Ich zal d’r ‘s euver dînke’ en wie hae later beldje of det ich der euver nao haaj gedachtj kos ich ‘m vertélle det ich ‘t waal zoog zitte, en sinds 11 december bin ich echt lid van ‘t bestuur van Veldeke Wieërt. Verder bin ich ‘dialectisch’: de medische benaming veur ein aandoning woeëbiêj de patiënt neet soonger dialect kân kalle. Is chronisch en helaas ongenaeselik. Dao naeve bin ich ouch nog lid van verschillendje oldtimerclubs omdet ich meîstâl in aoj auto’s, oppe Solex of mét ‘nen aoje fiets riej.
Naud vanne Waal
Efkes veurstélle; Leo Kwaspen
Ich wil mich effe vuuërstelle aan de minse di-j mich nog neet kinne.
Miene naam és Leo Kwaspen, in Zwertbrook geboeëre in 1953, det hétdje destiêds “oppe sjoemaeker”. Nao wat umzwêrvinge, Maasneel-Remundj, woeën ich noow op Bosseve same mét mien vraw Ans.
Vae hebbe twieë wichter: Roy en Nicole. Roy és getrawdj mét Lilian en di-j hebbe ouch twieë wichter: Lisa en Raf. Nicole woeëntj same mét Niels in Braobentj en hieët twieë bonuswichter: Milou en Luc.
Mien wêrk waas hieël divers, mer as bookhaojer heb ik mien carrière afgesloeëte op ‘t Bisschoppelijke College in Wieërt, as financieel administrateur.
Mien diverse bestuursfuncties (mieëstâl as penningmeîster) wore beej de buurtvereîniging, de fietsclub, SKO St. Oda en SKO Land van Weert, ’t tieëgewoeërdige Meerderweert. Wieter Lid van EHBO vereîniging Wieërt en ’t evenemênteteam en bestuurslid van VVN Wieërt.
Regeling Verkeersregelaars SVNL evenemênte.
De hobby’s di-j ich haaj en nog heb zeen: fotografie, wielrenne (noow gewoeën fietse op ‘ne ‘foetelfiets’), kokkerelle, bakke en tuiniere.
Naoteurlik neet te vergaete de vastelaovendj: wagebawwer beej de Flabbusse (diverse kieëre Gouwe Rog winnaars), preensschap beej de Brökwagters als preens Lei I, adjudânt beej preens Noud I vanne Brökwagters en zoot ich inne raod van Elf vanne Brökwagters, Bosseve.
Sinds 2016 hebbe vae ‘t lidmaotschap van Veldeke krink Wieërt. Ich bin gruuëts op ’t Wieërter dialect, de activiteite, de beuk, de scheurkalender en beej de organisatie van nog mieër hoeëp ich de kaomendje tiêd ’t vertrawwe in mich as nowwe penningmeîster waor te kunne make.
Leo Kwaspen
Dânkwuuërdje
Allerieërst dânke vör ’t zulvere ieërelidmaotschaps-spelke van Veldeke Wieërt. Ich bin d’r zieër mét verieërdj!
Wi-j ich 16 jaor gelieëje doeër Jan Feijen in ’t bestuur woeërd gevraogdj, zag ich: “Ich weît neet of ich mich wul kân hândhave tösse 6 mansluj”. Toen zag Lee Timmermans: ”Jèh jao Nelly, kom d’r mer beej, vae drage dich op hang!” Det hebbe ze ouch gedaon……….… (figuurlik neteurlik!)
Ich mót zégke det ich echt ‘ne feine tiêd heb gehadj in dit bestuuur, dae ich neet haaj wille misse.
Noow mót ich noeëdgedwoonge, mét pien in ’t hert, stoppe umdet de zikdje van Parkinson mich almèr mieër bepêrkinge oplégktj.
Mer ich bin d’r nog en blief nog gewoeën lid, zoeëlang asj gieët.
Ich wil de bestuurslede Jan Feijen, Jan Moonen en Lee Timmermans hieël hertelik bedânke vör de gooj en plezeerige samewêrking en vör ’t vertrowwe det ze in mich hebbe gestéldj.
De now bestuurslede wîns ich hieël völ succes mét ’t in stând haoje en uutdrage van oeës schoeën Wieërter dialect!
‘n Hieël good 2023.
Det wîns ich ouch alle lede en begunstigers.
Blieftj vörâl dialect kalle!!!!!
Nelly Haenen-van den Berg
Ge-ieërdj, verieërdj, gruuëts
11 december 2022. ‘nen Daâg um noeët te vergaete. Waat ’n verrassinge!
Det begos smêrges thoês al. Ich stóng klaor um op Wieërt aan te trómmele, wi-j Marly inéns zag: “Vae hove neet zelf te ri-jje, Roel bringtj os”. Fein, gemaekelik, röstig. Innen auto zote ouch oeës kleinzuuëns, Timo en Pim. Toen haaj eigelik e lêmpke mótte gaon börre, mer det gebuuërdje neet. Ich woeër in miene kop te zieër doondje métte vergadering. Good gemoojd trokke ve oppe stad aan.
Inne Soos stóng alles schoeën klaor; wi-j gewuuënlik. Det kujje mét e gerösj hert aan (dae ângere) Jan oeëverlaote.
De vergadering begos schoeën op tiêd èn mét ’n hoeëgtepûnt. Ich moch Nelly Haenen-van den Berg beneume tot ieërelid van Veldeke Wieërt. Nelly woeër d’r zieër verieërdj mej en terecht. Jaomer genóg woeër d’r te weinig tiêd um wat uutgebrédjer op âl zien verdeenste in te gaon.
Gawkletskes woeëre d’r ouch beej de introductie van oeës kandidaatbestuurslede. Mer Giel, Leo, Myrthe en Naud woeërte beej acclamatie gekoeëze. Daonao heb ich de vuuërzittershamer oeëvergedrage aan Giel. Mét völ plezeer en vertrawwe.
Daonao noeëm de (nowwe) vuuërzitter ’t woeërd um aafscheid te neme van mich, d’n aod-vuuërzitter. En toen begosj. Ajje âl di-j schoeën wuuërd op uch aaf huuërtj kaome, dan raaktj uch det. Ich woeërt d’r beduusj van. En det nao âl di-j waardieërendje en respectvol wuuërd dao ounog ’s de beneuming tot ieërevuuërzitter op volgdje woeër ’n ónvergaetelike ervaring. Ich zal de goûwe draagspeld mét ieëre drage.
En toen stónge dao inéns twieë bestuurslede van ’t Provinciaal bestuur vör mien naas, vuuërzitter Reg van Loo en penningmeîster Pieter Ebus.
Nog neet echt bekaome vanne emoties krieëg ich alweer völ kómplimênte. Ge zowtj d’r verlaege van waere. De beneuming tot ieërelid van Veldeke Limburg was ’t léste zétje um vanne wap te rake. Ich woeër e paar minute echt van miene sus aaf.
Wi-j ich weer beej de tiêd woeër, heb ich edereîn hieël hertelik bedânktj vör alle ieër dae mich ten deîl gevalle woeër en vör alle bemeujenisse di-j dieëze mêrge tot zoeë e schoeën fieëstje hebbe gemaaktj.
Mien leef Marly heb ich ouch bedânktj vör alle ruumdje en tiêd daetj mich gegaeve hieët um te doon, woeë mien hert en passie ligktj: oeës Wieërter dialecte.
Preuve maakdje ’t fieëstje kómplieët. Femiêlie Fonteijn, Esther en Stefan, hertelik bedânktj. Wi-j gezagdj veul ich mich zieër verieërdj, mer ich bin zieëker zoeë bli-j det ich nog deîl uut moog bliêve make van dit bestuur. Giel, Jan, Lee, Leo, Myrthe en Naud, bedânktj.
Aafsloêtendj: ich veul mich stiekem toch wul êrg gruuëts.
Good gemoojdj kwoeëme ve nao de stad. Nog baeter gemoojdj gónge ve op hoês aan.
Jan
’t Komplieëte now bestuur van Veldeke Wieërt:
V.l.n.r. Giel Bruijnaers, Jan Moonen, Jan Feijen, Myrthe Peeters, Naud Aendekerk, Lee Timmermans en Leo Kwaspen
Recente reacties