Schuuërkalender 2022

De Veldeke-schuuërkalender hieët zien vaste plaats gevoonge in hieël völ hoêshoajes binne ’t Wieërter lând. De editie vör 2022 is klaor en de ieërste kalender és op vriêdig 12 november uutgereiktj aan wéthaojer Tessa Geelen.

Ze ligke noow in alle bookwînkels in Wieërt en Ni-jwieërt.

Weer volges de beproofdje formule; vör edere daâg e spraekwoeërd of kwânt gezagdje (mét de beteîkenis) en e ‘woeërd vanne daâg’. De illustraties zeen dits kieër mét foto’s in kluuër uutgeveurdj en hebbe as thema de kepèlle in ’t Wieërter en Ni-jwieërter lând.

De populaire priês van € 12,50 és ‘tzelfdje as in vuuërgaondje jaore.

Echt wat um te hebbe of um cadeau te gaeve.

Dik inne priêze beej Limburgse declamatiewédstriêd!

Dik inne priêze beej declamatie!

 

Beej de Limburgse finale vanne declamatiewédstriêd 2017 hebbe de daelnemers uut oeëze krînk prima geprestieërdj.

Beej de allerkleinste van groep 3/4  kwoom Thomas Camp as 3e uut de bös.

Groep 5/6 waas hieëlemaol ’nen topper.  Thijmen Höppner woeërt in dieëze groep Limburgs kampioen. Ouch inne categorie 7/8 ging ‘ne priês mej nao de richting Wieërt. Tessa Stultiëns pakdje heej de 3e priês.

Alle drej de priêswinnaars kwome van basisschoeël De Kerneel uut Ni-jwieërt en daomej woor de gooj vuuërbereî-jing van schoeël en aojers terecht beloeëndj.

 

Proficiat allemaol!

 Thijmen Höppner   Thomas Camp    Tessa Stultiëns

Ieëre-vuuërzitter Piet Hermans gestôrve

2013 Piet Hermans

Veldeke Wieërt hieët ein van zien groeëte vlaggedragers verloeëre. Op 22 juni és ein vanne oprichters vanne krînkWieërt: Piet Hermans gestôrve.

Hae waas vanaaf de oprichting in 1978 d’n ieërste vuuërzitter en vanaaf det memênt és hae fanatiek in taw gewaesj um ’t dialect uut te drage en vast te légke. Ziene ieërenaam waas neet vör niks ‘Veldeke-Piet’. In 1986 droog hae ’t vuuërzitterschap oeëver aan Jan Vlemmings mer blieëf nog jaorelânk bestuurslid.

Naeve ânger uutgaves woor ’t ieërste Wieërtlands Woeërdebook zien groeëte trots. Dao in kosse same mét de redactiekemissie zien energie kwiêt.

Ontélbaar zeen de rubrieke di-j hae völdje inne waekblaar: ’t Kanton Wieërt, De Trompetter, ’t Lând van Wieërt, De Limburger, enz. Daomej woor hae de groeëte promotor van ’t dialect inne regio.

Op ânger gebied woor hae ouch altiêd fanatiek inne wieër beej sportief evenemênte.

Tot de léste daag woor hae geïnteressieërdj in alles waat Wieërt aangieët want inne aafgeloupe waeke heb ich nog regelmaotig mét hem gemaildj en gekaldj oeëver de oeërsprong van ’n vreuger schoeël: ‘de Kopkiet’ oppe Hégkstraot.

Det artikel zuldje kunne laeze in december in oeës blaâd ’t Trûmperke.

 

‘ne Feine mins um mej same te wêrke en dae gein ruzie kos verdrage és neet mieër.

Veldeke en Wieërt zeen Piet ontzéttendj völ dânk schöldjig.

 

Names ’t bestuur

Jan Moonen

Getuûgschrift

In september en oktoeëber haaj weer ‘ne flînke groep dames en hieëre de basiscursus Laeze en schriêve gevolgdj.

Ze prizzentieërdje eur meîsterwêrkop op dieënsdig 9 december. As bewiês van’ good gevolg’ krieëge ze eîn vör eîn eur getuûgschrift. Daobeej zoot ‘t 100ste getuûgschrift det ve vanaaf de start mét de cursusse koste uutreike.

Tössedoeër zong Jan Schroën uut Bieëgdje ’n aantal van zien prachtige lidjes mét stêrke tekste.

De belangstélling vör de cursus blieftj groeët, zoeëdet ve begîn volgendj jaor mét de volgendje lichting kunne starte.

Cursiste 2014Meîsterwerk

Lancieëring website

Piet HOp ‘ne gezellige dialectaovendj hieët de officieel lancieëring plaatsgevoonge. Ieërevuuërzitter Piet Hermans, dae mej aanne basis stong van oeëze krînk, tiepdje de naam vanne site in en daomej woor ze ‘online’.

Daomej staon vae ouch inne ri-j. ’t Woeërt ouch tiêd, want eder zichzelf respektieërendje vereîniging kân d’r neet ongeruut. Um uch beej e brejjer publiek te prizzentieëre mójje allewiel gebroêk make van, wi-j ze det neume, de ‘social media’.