E grandioos jubileumjaor 2018 koste ve in stiêl aafsloête. Nao alle vuuërgaondje geslaagdje activiteite di-j os as Veldeke nog ’s flînk oppe kaart hebbe gezatte kwoom in december de groeëte klapper. Nao lang vuuërbereî-jing en mét mejwêrking van hieël wat ânger vereîniginge woeërt Nelly Haenen beej ’t preuve inne SooS oeëverdonderdj doeër de komst van loco-börgemeîster Geert Gabriëls, dae kwoom vertélle detj ‘de kuuëning haaj behaagdj’ um hem de ongerscheî-jing as Lid inne Orde van Oranje Nassau tow te kinne.

Dette verdeenste dan neet allein binne ein vereîniging mer op mieërdere terreine motte ligke és algemein bekindj. Minse di-j Nelly kinne wieëte dao alles van. Veldeke, de van Hornevrouwen, de Bosseverbieëk, enz., mer neet as minste de persuuënlike zörg aan femiêlielede en ânger.

Proficiat!

Laesj de uutgebrédje motivieëring in ’t Trûmperke nr. 23, dejje oonger de button ‘uutgaves’ op dieës website kuntj vînge.

Det dit trio ’n hieël smakelike combinatie és zal nemes betwiste. De léste jaore make ve dao e fieëst van as in december de lunchshow ‘Veldeke preuve’ aangeboeëje weurtj.

Op zoondigmiddig 16 december waasj weer zoeëwiêt. Dan luiptj de SooS hieëlemaol vôl en gaon Mark Fonteijn en consorte los. Bekindje name uut de regio, zoeë as Linda Smeets, Jean Stassen, Esther Snijders en Gerwine Saelmans mét ziene Wil doon gaer mej. Ouch wat onbekindjer talênt as vocalgroup Mystique uut Ni-jwieërt kriegtj ’n kâns en op di-j meneer keumtj e muzikaal klasse-programma tot stând det aafgewisseldj weurtj doeër wat hertigs oppen tiêd.

De planning luiptj eder jaor duchtig uut de klawwe mer det deertj nemes.

Waat ‘ne stille druuëge zoondig al neet tewieëg kân brînge.

’t Ein book és ’t ânger neet.

Min of mieër toevallig és d’r binne Veldeke Wieërt ’n gewuuëndje ontstânge um eins inne 5 jaor ’n now uutgaaf te laote verschiêne. Vör dialectspraekendj Wieërt/Ni-jwieërt gein slechte gewuuëndje neteurlik. ’t Wieërtlands Woeërdebook (lang gelieëje) woor uteraard de groeëte blikvânger mer de ânger beuk mochte d’r ouch zeen. Name en beejname en verhäölkes vör de wichter um mer ’s wat te neume. De verzameldje spraekwuuërd in ‘Schoeën gezagdj’ wore vör de alledaagse laezer ’t mieëst amuzânt. Det alles rap uutverkochtj woor bewieës detj aansloog.

Det waas de kapstok um in ’t jubileumjaor nog ’s de spraekwuuërd ongerhang te pakke, gezeen ouch de massaal aanvöllinge di-j d’r intösse loge. Jan Feijen és d’r ’s good vör gaon zitte en hieët âl ’t materiaol ingedeildj op alfabet en geclusterdj. Op di-j meneer és ’n hieël now book ontstânge det mét völ teîkeninge és opgevroliktj. ’n Pil van dik 300 pagina’s mét neteurlik e trefwoeërderegister um vanuut ’t Nederlands gemaekelik te kunne zeuke.

E létterlik en figuurlik ’sjiek’ book det in september j.l. officieel és aangeboeëje aanne gemeindjebesture van Wieërt en Ni-jwieërt. Want ouch di-j spraekwuuërd uut ’t hieël Wieërter Lând staon d’rin.

Inne wînkel te koup vör € 29,95

’t Noetste nummer van oeës halfjaorliks tiêdschrift ’t Trûmperke és aanne Veldeke-lede gesteurdj.

Det és nummer 23 gewoeëre. Ouch bezeukers aan dieës website kunne ’t bukske doeërbladere,woeë in allerlej verslage, verhaole en gedichte mét völ foto’s zeen opgenoeëme.

Oonger ’t köpke ‘Uutgaves’ vingdje ‘ne knop vör ’t Trûmperke.

Völ laesplezeer.