As krînk Wieërt hebbe ve ’t jaor 2017 grandioos aafgesloeëte mét ’n muzikaal happening. Zoondig 10 december zoot de SooS oppe Mêrrentj tot inne léste hook vôl mét leefhebbers van dialectmeziek. De formule slieëtj aan det wiste ve nog van vuuërig jaor. Roond de middig e schoeën programma mét bekindje name. Dit jaor wore det Mark en Wilhelmien Fonteijn, Esther Snijders, Monique Knapen en Jean Stassen mét assistêntie van Maarten Lamerichs. Allemaol artieste uut de regio di-j gaer ânger minse amezieëre.

En dao slaagdje ze boetegewoeën good in. Ze maakdje d’r same e fieëstje van det kloonk as ’n klok en det waas te mêrke aanne minse inne zaal di-j volop genoeëte.

Det daobeej ouch nog wat hertigs te snuike waas dieëj d’r geîn kwaod aan mer groeëte trékker waas toch ’t dialect. ’t Smaakdje weer nao mieër!