De cursus Laeze en Schriêve blieftj êrg in trék. In aprîl en mei hieët weer ‘ne groep cursiste enthousiast gewêrktj en op 13 juni mochte ze eur diploma kaome aafhale.

Dae slotaovendj haaje ve gecombinieërdj mét ’n korte stadswândeling en umdet ’t boetegewoeën good waer woor kwoom det prima uut de verf.

Op ’n aantal plaatse in ’t centrum loze de cursiste eur ‘meîsterwêrk’ vuuër. Daonao gînge ve same nao ‘t Theatercafé vör de formeel uutreiking. Cultuurwéthaojer Geert Gabriëls leep spontaan mej en same mét oeëze voorzitter/cursusleider Jan Feijen daeldje hae de 14 diploma’s uut. Daomej zeen ve royaal oeëver ’t aantal van 150 geslaagdje cursiste doeër de jaore haer.

’t Waas ‘ne gezellige aovendj.