As aafsloêting van ‘t ‘Jaor vanne Limburgse dialecte’ beeje vae uch e bezûndjer programma aan oonger ‘t motto: PREUVE MÉT VELDEKE

op zoondig 11 december van 11.00 tot 14.00 oor inne SooS oppe Mêrrentj in Wieërt.

Det weurtj e muzikaal programma van hoeëg nivo mét völ artieste uut de regio di-j ouch hebbe mejgedaon aan oeëze groeëte theatershow ‘Kefee Veldeke’ op 4 juni in ‘t Munttheater.

Name as:

• Mark en Wilhelmien Fonteijn
• Monique Knapen
• Gerwine Saelmans en Wil Brouwers
• Esther Snijders uut Rooj
• Jean Stassen uut Ni-jwieërt
• Roger van Zundert uut Roggel

staon garânt vör ‘ne geweldjige middig.

Preuve aan dialect, aan meziek, mer ouch aan ‘n aantal luxe hertige hepkes.

Wildje dit zoondigmiddig-gebuuëre mejmake, same mét femiêlie of vreende, schrieftj dan oppentiêd in. As beejdrage vör ’t gehieël vraoge vae per persoeën € 12,50.

Steurtj vuuër 3 december eur aanmelding in via oeës mailadres: info@veldekewieert.nl

Heej krieje gegarandieërtj geîne spiêt van! Wachtj neet te lang, ’t aantal plaatse és bepêrktj.

Doeër alle enthousiaste reacties oppe Schuuërkalender van dit jaor zeen vae bekans verplichtj um dao mej doeër te gaon. Eîgelik waas det bedoeldj vör eîne kieër in 2016, ‘t ‘Jaor vanne Limburgse dialecte’.

’t Deut os good detter zoeëvöl belangstélling és vör oeës dialecte en mét plezeer kunne ve aankondige det de Schuuërkalender 2017 binnekort van d’n drökker keumtj.

Op ‘ne towpasselike datum, d’n elfdje vanne elfdje, gaon vae d’n ieërste kalender aanbeeje aan wéthaojer Geert Gabriëls.

Vanaaf zaoterdig 12 november ligke ze dan inne wînkel beej:

• Bruna in Wieërt
• Bruna in Ni-jwieërt
• van Bun inne Muntpassage
• Primera op Moêzel

De priês és nog e stök lieëger as vuuërig jaor. Noow € 12,50 per stök!!