Veldeke gieët létterlik de straot op um zich te laote zeen. Um ’t dialect oonger de aandacht te haoje és al meujlik genóg en mieëstâl hejje dao de hölp van ânger beej noeëdig. D’n eine kieër van schoeële (declamatiewédstriêd), d’n ângere kieër van gemeindjes (plaatsnaamborde). De léste opvallendje activiteit és op initiatief van Centrummanagement Wieërt uutgeveurdj en betreftj ’t beplekke van electriciteitskest inne binnestad.

Bekans oeëverâl zeen di-j kest beplektj of bespoeëte mét van alles en nog wat. Veldeke hieët mej moge wêrke aan ’t ontwikkele van hieël originieël stickers mét gezagdjes in dialect.

Vör boetestaondjers stieët de létterlike vertaling d’rbeej.

Grafisch ontwêrpers Inge Korten en Stef Mooren hebbe eur creatief aandael geleverdj.

De stickers zeen in ’n werm blaw kluuër gedröktj en op e stök of tieën plaatse binne Wieërt opgeplektj.

En noow mer hoeëpe det de batjes mét eur spuitbösse uut de buurt bliêve.