Veldeke Wieërt zörgdje vör ‘ne klapper in dit ‘Jaor vanne Limburgse dialecte’, innegang ‘t 90-jaorig bestaon van Veldeke Limburg.

Wieërt haaj ’t gezochtj in ‘ne grandioze theatershow mét bekindje en minder bekindje artieste uut Westelik Midde-Limburg. Zoeë woor de band ‘Limbo Project’ ingeschakeldj dae ziene zaetel in Roggel hieët. ‘ne Gouwe greep! Marleen Rutten uut Hunsel és ‘ne naam dae in hieël Limburg bekindj és en wieter gein towlichting noeëdig hieët. Wieter zêngers en zangeresse uut Wieërt, Ni-jwieërt, Ell, Staeveswieërt, enz.

Same bevôlkdje ze op zaoterdig 4 juni kefee Veldeke, zoeë as ’t Munttheater waas umgeduîptj. ‘n Aafgelaaje vôl theater waas getuûge van ’n daverendje muzikaal show mét de meîst uuteînloupendje soeërte meziek, van pittige rock tot loesterlidjes woeë dejje traone van inne ouge krieëgtj. De optraejendje artieste haaje d’r zelf zichtbaar lôl aan. Korte humoristische filmkes gove e prima bieëldj vanne variatie in dialecte en zien grenze. Prizzentator Ton Adriaens veuldje precies aan as d’r aanvöllendje informatie noeëdig waas of neet.

‘nen Aovendj dae puur reklaam vör ’t dialect waas! De tekste wore meîst vanne artieste zelf of van ‘tekstkunstenaar’ Mark Bouwmans, dae al meinig Limburgs artiest van lidjes hieët vörzeen.

E super-enthousiast publiek goof de artieste nao aafloup ’n staondje ovatie.

Beejkaomendj positief rizzeltaat waas ouch det d’n aovendj vör de krînk Wieërt ’n aantal now lede opleverdje.

Jan Moonen

Single uutveuring van de band JOSS.  Dit nummer és speciaal geschrieëve vör
de theatershow ‘Belaeftj kefee Veldeke’ beej ’t 90-jaorig bestaon van
Veldeke Limburg en ’t ‘Jaor van de Limburgse dialecte’.
Kliktj oppe blawwe tekst um de single te beloestere:  “Belaefdj Kefee Veldeke”

Tekst: Mark Bouwmans.  Meziek: Joss Mennen.