’t Waas effe winne wi-j ve op 13 aprîl oeës jaorvergadering hele in ’n hieël now umgaeving. Nao ’t aafvalle van oeës vaste plaats De Roos haaje ve noow ongerdaâk gevoonge in De Soos oppe Mêrrentj. ’t Schiltj mer ein létter mer és ’n werreldj van verschîl.

Wi-j gebroêkelik lepe ve rap doeër de vaste agendapûnte haer. ‘ne Trökblik doeër de sikkretaris mét bieëldje van alle aktiviteite uut ’t aafgeloupe jaor. ’t Financiëel oeëverzicht vanne penningmeîster enne herverkezing van Jan Moonen en Nelly Haenen in ’t bestuur woor allemaol gaw bekloonke.

As verrassing tössedoeër kwome e paar wichter vuuërdrage di-j 4 daag ieërder inne priêze wore gevalle beej de Declamatiewédstriêd.

Daonao waas ’t woeërd aanne cursiste di-j de léste basiscursus Laeze en Schriêve haaje aafgemaaktj. ‘ne Sterke groep, waat blieëk uut de verhaole en daels zelf gemaakdje gedichte di-j ze prizzentieërdje. Hieël bezûndjer daobeej waas det ein vanne cursiste (Léon Stroekxs van den Broek) zieëve waeke achtereîn vanuut Dordrecht nao Wieërt woor gekaome um de cursus te vôlge!

As aafronding van d’n aovendj krieëge ze allemaol eur getuûgschrift uut hang van cursusleider Jan Feijen.

De muzikale inbring waas van Joss Mennen dae gewindj és zien rippertwaar mét e flînk volume te brînge. Hieël ângers as ângers, dus de huuërapparate moste heej en dao duchtig beejgestéldj waere.

Toch ‘ne schoeëne gevari-ieërdje aovendj.