De jaorvergadering van Veldeke Wieërt stieët oppe rol vör woonsdig 13 aprîl.

Vae hebbe ’n totaal now locatie gevoonge woeëvan vae verwachte det ’t extra towloup zal oplevere, namelik beej sociëteit Amicitia oppe Mêrrentj.

De oeëpening vanne korte vergadering és um 20.00 oor. Beej de verplichdje agendapûnte o.a. de bestuursverkeezing, woeëbeej Jan Moonen en Nelly Haenen aaftraeje en zich herkeesbaar stélle.

Nao dit gedoons kriêge de cursiste van de léste cursus Laeze en Schriêve de microfoon um eur ‘proofwêrk’ te prizzentieëre. Daonao kriêge ze eur getuûgschrift uutgereiktj.

Vör muzikaal oploestering zörgtj Joss Mennen dae daomej e vuuërpreufke geuftj vör oeëze groeëte theatershow op 4 juni. Dan stieët ’n hieël serie artieste uut de regio oppe buun in ’t Munttheater um ‘t ‘Jaor vanne Limburgse dialekte’ kluuër te gaeve.

Kaarte koste mer € 15,- en zeen te kriêge aanne kassa van ‘t theater.

Veldeke Wieërt kân weer trökkieke op ‘ne bezûndjer geslaagdje Declamatiewédstriêd.

Op zaoterdig 9 aprîl zoot zaal Don Bosco bomvôl mét wichter, aojers en ânger supporters. Gelökkig dieëj d’r dit jaor e groeëter aantal schoeële uut Wieërt zelf mej. De lieërlinge uut de regio Wieërt haaje zich good vuuërberédj en prizzentieërdje zich prima. Ze declamieërdje op hoeëg nivo eur dialectgedichte.

Mét name de allerkleînste, di-j vör ’t ieërst mejdieëje, inne categorie 3/4 stoeële de show.

De uutslaâg waas as volgtj:

Groep 3/4:

1e plaats Thijmen Hoppner van De Kerneel, Ni-jwieërt

2e plaats Jolijn Coolen van De Firtel, Rooj

3e plaats Lotte Jetten van De Kerneel, Ni-jwieërt

Groep 5/6:

1e plaats Jolijn Verheijen van De Firtel, Rooj

2e plaats Sara Stultiens van De Kerneel, Ni-jwieërt

3e plaats Aimée Driessens van Aan de Bron, Wieërt

Groep 7/8:

1e plaats Gwen Niellissen van De Firtel, Rooj

2e plaats Tessa Stultiens van De Kerneel, Ni-jwieërt

3e plaats Jules Teeven van Molenakker, Wieërt

‘ne Enthousiaste wéthaojer Geert Gabriëls reikdje nao aafloup de priêze uut.