Innen aanluip nao ‘t 90-jaorig bestaon van Veldeke Limburg in 2016 kwome allerlej ideeje los. Zoeë maaktj Maurice Ambaum al jaorelânk mét völ succes schuuërkalenders vör Venlo en Tegele. E mailrondje langs de ânger Veldeke-kringe leverdje hieël wat reacties op. Ouch vae as Veldeke Wieërt hebbe dao op ingehaoktj en gînge aan ’t wêrk.

Jan Feijen maakdje ‘nen ieërste aanzét mét ’n groeëte selectie spraekwuuërd en beejpassendje ‘wuuërd vannen daâg’. Same mét Nelly Haenen hieëte de liêst aangevöldj en gecontrolieërdj. Oppe aafgesproeëke tiêd koste vae ’t komplieëte bestând mét umslaâgfoto, enz. aanlevere en kos d’n drökker aanne gang.

Mét völ hölp vanne media begoste ve de vuuërinschriêvingsactie en uut de enthousiaste reacties blieëk al rap det ve midden inne roeës geschoeëte haaje. ’t És ouch e kuipke; vör € 10,95 ’n alik jaor aldaag plezeer van spruuëke en wuuërd in dialect!

Op 24 november waas ’t zoeë wiêt, de kalenders wore binne. Vae haaje wéthaojer Geert Gabriëls gevraogdj um d’n ieërste kalender officieel in ontvangst te neme en det dieëje mét zichtbaar plezeer. Hae waas bezûndjer te spraeke oeëver dit initiatief in oeës en zien moôdertaal.

Vör de bookhândel waas dit ouch now en ze begoste mét hieël vörzichtige bestéllinge. Mer de PR haaj zie wêrk gedaon en d’r kwoom klandizie genóg op aaf. Binne ’n waek wore ve aan naobestélle tow. ‘ne Prima stûnt um oeës dialecte weer ’s breîd oongere aandacht te brînge.

Vuuërluipig bliêvet beej dieës uutgaaf. ’t És achter de schêrme ‘nen hieëlen houp wêrk. Meschien det ve beej oeës eîge jubileum van Veldeke Wieërt in 2018 ’t drejbook weer vör d’n daâg hale.

De kalenders zeen nog te koup beej de Wieërter bookhandelare vör € 13,95.

Jan Moonen

Zaoterdig 7 november, Brasserie Antje van de Statie. De aafrónding vanne ieërste fase van Stamtaofel Wieërt (oeës samewêrkingsproject mét De Aldenborgh en Kei Sjiek) stieët op pûnt van beginne. Weer ‘n hoeëgtepûnt.

Inéns huuërtj ’t verzameldje gezelschap ’n bel, e vertroedj geluid, mer wul van lang ti-jje haer. Al gaw woeërtj dudelik. Trûmpendjes en mét vör ziêne laeftiêd kloke pas kwoeëm ‘Tieske d’n Umbelder’, ouchwul ‘’t Umbelderke’ geneumdj, vanne statie aaf. Wi-jte âl ’t vôlk zoog, wisse waat ‘m te doon stóng. Mét klaor stum kóndigdje hae de prizzentatie van oeës book ‘Stamtafel Weert’aan.

Daonao deut Frits Weerts uut de deuk wi-j ’t ein en ânger ontstânge és. Van kop tot stert zeen ve d’r ruum dri-j jaor mej doondje….en ve zeen nóg neet oeëver de stert. Kern van ’t project woeëre de stamtaofelmiddige di-j in mennige kefee inne stad en oppe boeteni-jje hebbe plaatsgevoonge. Dao zeen de sterke verhaole, anecdotes, historische gegaeves en foto’s vör d’n daâg gekaome.
Wi-j ’t vêldjwêrk achtere rök woeër, hebbe ’n aantal schriêvers de verhaole op pepeer gezatte. Oonger de enthousiaste leî-jing van Frits Weerts en Peter Clement hieët det gerizzeltieërdj in e geweldjig bookwêrk; völ verhaole, op ’n înkel uutzoongering nao ammaol twieëtalig (dialect en Nederlands) en ’n bössel foto’s. Ouch de lay-out doeër Bert Lempens springtjer uut. Mienen inbring zow (naeve ’t schriêve van e paar verhaole) bestaon uut ’t vertale van alle tekste en d’rvör te zörge det ze inne gooj spelling stónge. Uuteindelik és dao ouch de indjredactie beej gekaome.

En dan ésj zoeëwiêt. Frits reiktj hieël gruuëts ’t ieërste exemplaar uut aan ‘Jan van der Croon’. Dae és dao zieër verieërdj mej. In zien dânkwoeërd zieëte dan ouch d’r geîne spiêt van te hebbe dette -same mét ‘Tieske’- vör dieëzen daâg ’t ieëwige effe verruuëldj hieët mét ’t alledaagse laeve in Wieërt.

Nao de prizzentatie trokke ve mét völ trellêl doeëre stad op kefee Tramhalt aan. Ouch dao woeërtj haole klot.

De realisatie hieët völ draod gekosj, mer ’t rizzeltaat luugtjer neet um. En waat ouch téltj: ge belaeftjer zoeëvöl plezeer aan. Zieëker aanne dialecttekste, want di-j bliêve toch ’t mieëst spraekendj en gaeve daodoeër völ laesplezeer.

’t Book és nog te koup beej bookhândel Tindemans en de kefees De Hermeni-j, Tramhalt en Dennenoord. Priês € 34,50. En waat dae stert aangieët: d’r keumtj nog ’n DVD aan. Haojet mer inne gate!!

Jan Feijen

Oeëze naojaorsaovendj op 25 november zoog d’r wat ângers uut as inne aafgeloupe jaore.

Mieëstâl hebbe ’n lichting cursiste di-j dan eur ‘meîsterwêrk’ prizzentieëre en dao doon ve dan wat muzikaals umhaer. Mer det ieërste waas d’r dieëze kieër neet beej. De vervolgcursus Laeze en Schriêve woeë nao gevraogdj waas haaje ve geplandj mer uuteindelik wore d’r te weinig aanmeldinge um van start te gaon.

De vervânging woor d’r neet minder um en ouch echt Wieërts. De manne vanne waalbekindje Lambieck Knoup woeëje gaer ’n prizzentatie verzörge oeëver eur activiteite en daobeej spuuëltj ’t verzamele van stom streek de hoeëfdrol. De uutreiking vanne gouwe, zulvere en broonze Lambieck stieët eder jaor in jannewari of fibbrewari garânt vör ‘ne kolderieke aovendj.

Mét ’t vertélle van ’n aantal vuuërvalle uut de aafgeloupe jaore woeërt al rap dudelik waat vör stommiteite minse kunne uuthale of, zoeë as inne statute vanne Knoup stieët: “serieus bedoeldje vuuërvalle di-j in eur uutwêrking kolderiek uutpakke”, soonger det dao echte ongelökke beej gebuuëre of det de plies d’raan te pas mot kaome.

Troubadour Jan Schroën wisseldje woeërd en bieëldj aaf mét ’n serie van zien prachtige lidjes op iêzersterke tekste.

Nao de pauze mochte de minse inne zaal zelf aanne gang mét ’t keeze van euren eîge alternatieve Gouwe Lambieck.

’t Programma vong e dânkbaar gehuuër in ‘ne good gevöldje zaal.

Jan Moonen