De Declamatiewédstriêd dae oeëze krînk eder jaor organizieërtj és weer e groeët succes gewoeëre.

Dieëze kieër dieëje 22 wichter uut de groepe 5 tot en mét 8 mej, woeëbeej de schoeële uut Rooj en Ni-jwieërt de boeëvetoeën veurdje. De Wieërter schoeële lete ’t zwaor aafwieëte. De wichter van ’t Palet moste de ieër van stad en boeteni-jje hoeëg haoje en det dieëje ze boetegewoeën good.

Inne groep 5/6 wore de winnaars:

1. Jolijn Verheijen
2. Minke Sniekers
3. Nikki Leijssen

Alle drej lieërlinge van De Firtel uut Rooj.

In groep 7/8 waas d’n uutslaâg:

1. Isa Hermus
2. Imke Baetsen
3. Beau van den Borne

Ouch di-j wore alle drej van De Firtel  en di-j schoeël waas dan ouch de groeëte winnaar van d’n daâg.

Wéthaojer Harrie Litjens haaj d’r goojen aard aan en vong ‘t ‘ne zieër geslaagdje wédstriêd.

Hae reikdje op ’t indj vanne middig de priêze uut.

De nummers 1 en 2 uut edere groep gaon mejdoon aanne Limburgse finale.  Di-j zal zeen op 16 mei in Haerle.

Ve hebbe d’r alweer e kwartaal opzitte van dit jaor en aprîl és vör os altiêd ‘nen hieële bezûndjere maondj.

Vör de 11^e kieër haoje ve ‘ne Declamatiewédstriêd vörre basisschoeële.

De finale daovan zal zeen op zaoterdig 11 aprîl en begintj um 14.00 oor in zaal

Don Bosco op Bosseve.

’t És schoeën um te zeen wi-j di-j wichter van 8 tot 12 jaor zich prizzentieëre.

Gae zeetj van herte genuuëdj um ’s te kaome kieke.

Zoeë ajje meschien al gehuuërdj hetj, bestieët Oeëpelöchtmuseum Eynderhoof dit jaor 25 jaor. Vanaaf 1990 heb ich alle weteswaardighede opgeschreve en foto’s gemaaktj van en over de gebouwe en ‘t wêrk binne ‘t museum.

Beej gelaegenheid van ‘t jubileumjaor heb ich mét âl dees gegaeves e book samengestéldj.     In gooj samewêrking mét Frenk Scheepers as redacteur en vormgaever, hebbe vae de léste dri-j jaor dao intensief aan gewêrktj.

Dit book és vörâl ‘n ieërbetoeën aan alle vreejwilligers van Eynderhoof, di-j dit museum hebbe gebawdj en dao nog aldaag aan wieter wêrke.

Mét ‘ne dikken houp kleurefoto’s, tösse de 650 en 700, heb ich geprebeerdj edere vreejwilliger in ‘t book te kriêge.

E klein gedaeldje zeen zwert/wit foto’s vanne oorspronkelike gebouwe.

In ‘t book waere de gebouwe in bawvolgorde behândeldj. De geschiedenis d’rvan, de oeërspronkelike bewoeëners, de aafbraak enne herbouw. Ouch de ambachte di-j in det gebouw zeen ongergebrachtj kome oetveurig aanne orde, soms mét ongersteuning van deskundige vreejwilligers. Groepe di-j neet in e gebouw zeen ongergebrachtj waere apaart behândeldj, want ouch de verhaole, vertélselkes en gedichtjes, vertéldj door de ‘Buurtersgroep’ staon d’r in.

Daerum és dit book ouch hieël belangriêk vör wichter en kleinkîndjer di-j kunne zeen en laeze wi-j eur aojers en groeëtaojers gewêrktj en vertéldj hebbe in ‘t museum. Det ze mejkriêge waat dees minse hebbe gedaon vör ‘t beware van oos cultureel en heemkundig erfgood en ‘t te beschêrme.

Âl di-j aoj gewuuëndjes en gebroêke, dînktj mer aanne verseerdje dèn op ‘t hoeëgste pûnt van e now gebouw, de sprieëwepot aanne gaevel, de Zichtezoondig in juli. De beteîkenis van oos Levraw in ‘t kestje aanne veurgaevel, ‘t kruûs bove ‘t keldergaât en zoeë wieter.

In ‘t kort gezagdj: de geschiedenis vanne mins roondj de Pieël.

‘t Jubileumbook és ‘n eînmaolige oetgave door de Stichting Heimschans en umvatj ongevieër 250 bladzijde in A4 formaat, mét haarde kaft.

Edereîn dae belangstélling heet kân zich inschriêve. Beej veurinschriêve (veur 15 aprîl) kosj ‘t book € 22,50, nao 15 aprîl kosj ‘t € 27,50.

Overmake kân via Rabobânk Wieërt NL65Rabo 0302081038 t.n.v. HMTG Koppen, oonger vermelding “Jubileumbook 25 jaar Eynderhoof”, gaer mét mailadres.

Vae zeen van plan um ‘t book hâlf mei oet te reike en vae kunne uch det dan via de mail laote weete of ângers via de gezét.

Wildje mieër wete ? Mailtj nao: boekeynderhoof@gmail.com

Mét vrîntjelike groete, Harrie Koppen

P.S. Dit book neet te verwerre mét ’n ânger fotobook det de Stichting Vrienden van Eynderhoof binnekort uutgeuftj.