’t Deurtj nog effe mer in 2016 zal Veldeke as Limburgse vereîniging 90 jaor bestaon.

Dao zuldje te ziêner tiêd ’t noeëdige van mêrke. Veldeke hieët alvast 2016 uutgerope as ‘ ’t Jaor van ’t dialect’.

Vae as krînk Wieërt zeen in 1978 opgestartj en dao oeëver kujje oonger ’t köpke ‘Historie’ van dieës website ’t noeëdige laeze.

In ’t kader van ’t 90-jaorig jubileum van Veldeke Limburg waere doeër de regionaal kringe ouch festiviteite opgezatte. Zoeë zulle vae in juni 2016 ‘ne groeëte dialectaovendj haoje in ’t Munttheater. Mét de invölling daovan zeen ve al drök doondje.

Vae haojen uch oppe huuëgdje.

’t Klînktj meschien neet altiêd positief mer in dit gevâl zieëker waal.
Mét oeës eîge Wieërter Wiefke bedoele ve Ton Bijsterveld-Claessens dat neet heej woeëntj mer daodoeër zien eîge dialect good bewaardj hieët. Ton hieët inne aafgeloupe jaore al twieë amezânte bukskes uutgegaeve. ’t Ieërste in 2009 oonger d’n titel: “Ich meuj d’r mich neet mej”, zag ’t wiefke”, en ’t twieëdje in 2010 mét as titel:  “ ’t Wiefke wétj weer wat”.
Köstelike korte verhäölkes, dék op waorheid gebazieërdj mét e bitje fantasiesous d’r oeëverhaer, uut ’t dageliks laeve vreuger en noow in Wieërt en mét name in Fatima.

Noow hieët ’t dêrdje bukske ’t daâgleecht gezeen en d’n titel zal uch neet verbaze:
“ ’t Wiefke blieftj kalle”. Ouch noow weer vôl laeveswiêsheid en vörâl humor.

Dit bukske és te bestélle via de website www.boekscout.nl. Ge kujjet ouch via de bookhândel bestélle mer dan mojje ’t ISBN nummer beej de hând hebbe en det és: 9789402212013.
De priês és € 14,95, excl.verzendköste.

Waat ouch interessânt és: Ton keumtj hieël gaer zien verhäölkes vuuërlaeze vör vereîniginge, bejaarde, enz.
Zien tillefoonnummer és 040-2213489 en ’t mailadres: tfbijs@upcmail.nl

De vaste lede en begunstigers kinne oeës halfjaorliks contactblaâd ’t Trûmperke mét informatie, verhäölkes, gedichte en wieëteswaardighede. Uut reacties wieëte vae det ’t hieël good gewaardieërdj weurtj. Noow ve ’n eîge website hebbe zoeëjdje uch aaf kunne vraoge of dit nog noeëdig és. De echte fanate zégke dan: alles kân toch digitaal!!

Toch zulle ve dit schoeën bukske in gedrökdje vôrm aan edereîn bliêve thoêssteure en waal um verschillendje rieëje. Oppe 1e plaats hebbe neet âl oeës lede ’n internetaansloêting en waat vör os nog völ belangriêker és: ’t és e contactmemênt um te laote zeen det Veldeke Wieërt nog aan uch dînktj soonger dejje persé oppe computer motj gaon zeuke of d’r nog noets és.

Vör actueel informatie és de website neteurlik hieël waerdevôl.

In september en oktoeëber haaj weer ‘ne flînke groep dames en hieëre de basiscursus Laeze en schriêve gevolgdj.

Ze prizzentieërdje eur meîsterwêrkop op dieënsdig 9 december. As bewiês van’ good gevolg’ krieëge ze eîn vör eîn eur getuûgschrift. Daobeej zoot ‘t 100^ste getuûgschrift det ve vanaaf de start mét de cursusse koste uutreike.

Tössedoeër zong Jan Schroën uut Bieëgdje ’n aantal van zien prachtige lidjes mét stêrke tekste.

De belangstélling vör de cursus blieftj groeët, zoeëdet ve begîn volgendj jaor mét de volgendje lichting kunne starte.

Op ‘ne gezellige dialectaovendj hieët de officieel lancieëring plaatsgevoonge. Ieërevuuërzitter Piet Hermans, dae mej aanne basis stong van oeëze krînk, tiepdje de naam vanne site in en daomej woor ze ‘online’.

Daomej staon vae ouch inne ri-j. ’t Woeërt ouch tiêd, want eder zichzelf respektieërendje vereîniging kân d’r neet ongeruut. Um uch beej e brejjer publiek te prizzentieëre mójje allewiel gebroêk make van, wi-j ze det neume, de ‘social media’.