Spruuëke vanne maondj – oeëverzicht

Gae kuntj mich de geit mêlke
(Je kunt mij nog meer vertellen)
Zoeë lang ve nog wat te knoeëtere hebbe, moge ve neet klage
(Zolang we nog kunnen mopperen, gaat het ons goed)
Det geneusj mét e brubbelke (Dat loopt met een sisser af)
Kâl wi-j kook (Onzinnige praat)
D’n twieëdje trouw és opgewermdj aete! (Gezegd als iemand voor de tweede keer trouwt)
Dae és niks gewindj as kaoj aerpel (Hij is wereldvreemd / geen luxe gewend)
Dae zeen ich leêver van achtere as van vuuëre (Ik zie hem liever gaan dan komen.)
Good getuûg mót oonger ’n aafdaak hânge! (Gezegd door iemand die gewezen wordt op zijn dikke buik.)
Det és ‘ne schaele wielewouw (Hij loenst)
Dae hieëget zoeë drök as de pan mét vastelaovendj (Dat is een druk baasje)
Stroont weem hieët uch geschieëte? (Ben je je afkomst vergeten?)
As det gebuuërtj, gieët de Maas bêrgop. (Dat is onmogelijk)
Ajje in mieën schoon pisj, druuëgtj det slecht op. (Een belediging vergeet ik niet snel.)
As de wîndj van Ni-jwieërt keumtj, doûget neet! (Gezegd door Weertenaren bij noordenwind; dan is / wordt het koud.)
Vreuger haaje de jóng snoeëterkuûke, mer allewiel hebbe de snoeëterkuûke jóng. (Kinderen zijn tegenwoordig vroeg rijp)
Neet vuuër elf oor gaon kakke (Geen uitspraak durven doen)

Laotj ‘nen hoond ziene schînk en ‘ne boor ziene kêrmes (Gun ieder zijn pleziertje)

Dae mét de dochter wiltj trawwe, mót mét de moôder vri-jje.  (Wie naar de hand van de dochter dingt, moet het goed houden met de moeder.)

Körse aete és zjuust wi-j vri-jje, gae hetj d’r eure boêk van vôl en toch gaoje d’r mej doeër. (Ergens genoeg van hebben, maar er toch mee doorgaan)

Det hieët mich wat kiskenaatjes aan zien koont – (Zij verbeeldt zich heel wat)

As ’t water zaktj, kraak ’t iês – (Als je moet plassen, laat je vaak een wind)

Di-j doon ich leêver uut as de knienskoeëj
(Met haar zou ik wel eens een avondje op stap willen gaan)

Ich zat ‘m mette kop oppe wîndj – (Ik joeg hem weg)

Doeër motraengel en nónne waerdje ’t mieést bezeîktj –(Schijn bedriegt)

Dae nejtj zienen eîge naod – (Hij doet toch wat hij zelf wil)

Aoj minse mójje neet vertujjere – (Een oude boom moet je niet verplanten)

Dae de dikke tróm wiltj reure mót wieëte woeëte haer mót steure.
(Bemoei je er niet mee als je er geen verstand van hebt)

E paerd det oppe luip és en e vrawmes det wiltj trawwe, dao és gein haoje aan.
(Een paard op hol en een verliefde vrouw zijn niet in de hand te houden)

Det és ‘ne jieëger op taam haze – (Hij is gemakzuchtig)

Ajje heej broeëd hetj, hoofdje neet vör mik nao Pruûses.
(Je moet niet denken dat het in den vreemde altijd beter is)

Ein paerd liêtj mieër van ’t staon dan van ’t gaon
(Stilstand is achteruitgang)

Dae kaltj Frâns met haor op – (Die praat slecht Frans)

Zitj uch wat oongere veut? – (zit je wat dwars?)

Op e blaw steinke pisse – (de zaak doen vergeten)

Veugtj uch e bitje – (doe een beetje normaal)

Dae stiktj d’r gein moel aan – (hij proeft er niet eens van)

Dao keum ’t zeut binne – (zonder veel moeite veel geld verdienen)

As de daag gaon lînge, gieët de kaoj drînge
(Als de dagen gaan lengen, begint de kou te strengen)

Hae zal zien uigskes nog dék wassen in law water
(hij zal er nog vaak een traantje om laten)

Gaotj kernelle aanne knaal – (Hoepel op)

Eder ziene meug – (over smaak valt niet te twisten)

Dootj mer oftj vör eur eige és – (Je hoeft niet zo zuinig te zijn)

Wi-j wildjet noow? Dik, dun of doeër e dukske.
(Zeg maar hoe je het hebben wil)

 

 

Spruuëk
vanne maondj:

Gae kuntj mich de geit mêlke.

(Je kunt mij nog meer vertellen)

Oeës beuk

Persuuënlik contact

Sikkertariaat Veldeke Wieërt
Beatrixlaan 52
6006 AK Weert
0495-537790
info@veldekewieert.nl

1474847591_square-facebook

Pârtners:
Veldeke Limburg