Cursusse

Laeze en schriêve in eur eîge plat

Vae verzörge de volgendje cursusse

  • Basiscursus
    Cursus vör beginners. Ennigste vuuërwaarde és dejje plat kaltj. In dieëze cursus stieët de spelling centraal. ’t Gieët inne ieërste plaats um de koppeling van klânk en teîke.
    In oeës spelling hieët edere klânk ‘n eîge teîke. Inne cursus lieëre de cursiste di-j oppe gooj meneer aaneîn te koppele. Det beteîkentj dus good loêstere en dan altiêd oppe zelfdje meneer opschriêve waaje huuërtj.
    Mét de cursus wille ve bereike, det de cursiste de in eur eîge dialect vuuërkaomendje klânke vlot en correct inne geschrieëve taal kunne herkinne en gebroêke. Gae laesj ’t good: in eur eîge!
    ’t Gieët dus oeëver alle Wieërtlandse dialectvariânte di-j de cursiste spraeke. En ve hebbe ouch al ge-experimentieërdj mét ânger, bv. ’t Roojs en det és ouch good gegânge.
    ’t És dus e groeët misverstând ajje zoetj dînke dejje mer mét eîne dialectvariânt bieëzig zeetj of de variânt van ‘nen ângere zoetj mótte gaon lieëre. Euren eîge variânt keumtj oppe ieërste plaats.
    As aafsloêting vanne cursus schriêve de cursiste e Meisterwêrk.
    Dieëze cursus deurtj 7 aovendje.
  • Vervolgcursus
    Cursus vör gevorderdje. Vuuërwaarde és dejje de basiscursus hetj gevolgdj of op ’n ânger meneer kuntj laote zeen dejje al behuuërlik bedrieëve zeetj in ’t schriêve van plat.
    Centraal staon de typische eigenschappe van ’t plat as taal. Daodoeër keumtj naeve spelling ouch de grammatica wat mieër aan bod. As aafsloêting vanne cursus schriêve de cursiste e Meisterwêrk.
    Dieëze cursus deurtj 5 à 6 aovendje.
  • Opfriscursus
    Cursus vör aod-cursiste. In de cursus wurtj raekening gehaoje métte vraoge vanne cursiste.
    Dieëze cursus deurtj 4 aovendje.

Hejje interesse?  
Gaeftj uch dan op via info@veldekewieert.nl Ki-jje ânger geïnteressieërdje? Laotj ze zich mer melle!

D’n ieërste cursus és al naojaor 2001 uutgeveurdj; as ‘pilot’ vör e zéstal dames van de “van Horne Vrouwen”. Det waas in feite ’t proofdrejje vanne cursus dae ve métte kemissie Educatie van Veldeke Limburg haaje opgezatte. Vanaaf 2003 hieëte daonao zoeëwat jaorliks plaatsgevoonge, sóms zelfs in vuuër- èn naojaor. Allein in de jaore 2008 en 2009 zeen gein cursusse aangeboeëje umdet toen vuuërrang és gegaeve aan ’t schriêve van de now spellingregeling. Vanaaf vuuërjaor 2010 ésse weer eder jaor uutgeveurdj

De léste jaore hevve oeëver belangstélling neet te klage; de towloup és groeët en konstânt en de wachtliêst naomenânt. Vae zeen d’r bli-j mej! ’t Geuftj aan det hieël wat minse doondje zeen met schriêve in ’t plat. En det ze det dan ounog oppe gooj meneer en volges de léste regels wille doon, és hieëlemaol geweldjig.

Tot noow tow:

Aantal cursusse: Aantal cursiste:
Basiscursus: 20 225 cursiste
Vervolgcursus: 2 18 cursiste
Opfriscursus: 1 9 cursiste
Trökkombeejeînkomst: 1 9 cursiste
Totaal tot indj 2018: 24  cursusse

De cursiste kaome oeëverâl vandan en zeen van alle laefti-jje; van inne twîntjig tot oeëvere tachetjig. Wi-jtjer noow uutzuût zulle ve nog wul effe doeërgaon mét ’t verzörge van cursusse; geî prebleem, det doon ve gaer!

Spruuëk
vanne maondj:

Alles oppe tiêd en bógesekook innen herfst
(Gezegd als kinderen zeuren om iets te krijgen)

Oeës beuk

Persuuënlik contact

Sikkertariaat Veldeke Wieërt
Beatrixlaan 52
6006 AK Weert
0495-537790
info@veldekewieert.nl

1474847591_square-facebook

Pârtners:
Veldeke Limburg