De tandarts

Gemiddeldj twieë kieër in ’t jaor vèltj’r ein breefke inne bös

Woeë-op gedröktj steît: ‘ Volges oos administratie

is ’t ein half jaor geleeje detj gae bie de tandarts woortj.

Wilt gae eine aafspraok make veur ein kontrolatie’

Dan belse op, de assistente zeuktj eine sjoeëne datum oet

Gelökkig wiêt genog ewèg, dus ’t kân get lieje

Mer de kalender hèltj ’t biê en dus ontkeumse d’r neet aan

en is de daâg dao om mèt sjrik d’r haer te rieje

 

Dan ligkse lânkoet inne stool en gaon de sjerpe lâmpe aan

en zeet dae witte jas: ‘Doot effekes wiêt ope!’

Dan veulse wie ein vinnig häökske mèt ein akelig gekras

tösse dien tenj en langs diên tandjvleîs keumtj gekrope

Dan is ’t altiêd erg spannendj waat de oetslaâg waal maag zeen

Heet hae toch hiê of dao ein gaât kinne ontdékke?

Motter geboordj, gevöldj, of weurtj ’t eine deure gouwe kroeën

of zeetter: ‘Dae is rot wie kieës, dae mot ich trékke!’

 

Soms is ’t nogal twiêfelechtig, hae vertroetj de zaak nog neet

en maaktj ein foto om ’t hieël precies te wete

Det geuftj dich nog ein bitje hoop mer effe later keumtj de klap

want achterin bliêktj eîne stiekem tóch verslete!

 

Mer deze kieër véltj ’t mich mét want alles zuûtter prima oet

al zeen d’r sommige get vaâl en broên gewore

‘Get minder rouke!’ zeetter lachendj, ‘en dan waere die weer wit’

en ich neem mich veur om nog get haarder gaon te sjore

Dan rietse heivers en ’t liêktj as-ofse hieël get lichter bèst

en langsem aan beginse weer get te bekome

De towkomst zuûtter straolendj oet, ’t laeve lachtj mich alweer aan

ich hoof pas nao ein half jaor weer trök te kome

 

Lei Steijvers, Rooj

 

< Gaotj trök nao oeëverzicht

 

Spruuëk
vanne maondj:

Good getuûg mót oonger 'n aafdaak hânge!
(Gezegd door iemand die gewezen wordt op zijn dikke buik.)

Oeës beuk

Persuuënlik contact

Sikkertariaat Veldeke Wieërt
Beatrixlaan 52
6006 AK Weert
0495-537790
info@veldekewieert.nl

1474847591_square-facebook

Pârtners:
Veldeke Limburg